काठमाडौँ-
राष्ट्रिय सभा अन्तर्गतको विकास, आर्थिक मामिला तथा सुशासन समितिमा आगामी आर्थिक वर्षको बजेट तथा आर्थिक नीतिसम्बन्धी छलफलका क्रममा अर्थमन्त्रीलाई उपस्थित गराएर छलफल गर्नुपर्ने माग सांसदहरूले गरेका छन्।
सोमबार बसेको समितिको वार्षिक कार्ययोजना सम्बन्धी छलफलमा सांसदहरूले बजेट तयारी, प्री–बजेट छलफल र क्षेत्रगत प्राथमिकताबारे विस्तृत छलफल आवश्यक रहेको बताएका हुन्। उनीहरूले अर्थमन्त्री डा. स्वर्णिम वाग्लेलाई समितिमा बोलाएर सरकारको आर्थिक नीति र बजेट प्राथमिकताबारे छलफल गर्नुपर्ने धारणा राखेका छन्।
छलफलमा घनश्याम रिजालले प्री-बजेट छलफललाई नियमित प्रक्रिया अनुसार अघि बढाउनुपर्ने बताएका छन्। उनका अनुसार संवैधानिक व्यवस्थाअनुसार प्रत्येक वर्ष जेठ १५ गते बजेट प्रस्तुत हुने भएकाले त्यसअघि संसदीय छलफललाई प्रभावकारी बनाउनुपर्ने आवश्यकता रहेको छ।
त्यसैगरी रेखा कुमारी झाले मधेश क्षेत्रलाई केन्द्रमा राखेर बजेट विनियोजन हुनुपर्ने धारणा राखेकी छन्। उनले क्षेत्रीय आवश्यकता अनुसार समानुपातिक विकास नीति आवश्यक रहेको उल्लेख गरेकी छन्।
सावित्री मल्लले पनि अर्थमन्त्रीसँग प्रत्यक्ष छलफल गरी बजेटमा मधेश, कर्णाली लगायत पछाडि पारिएका क्षेत्रलाई प्राथमिकता दिनुपर्ने बताएकी छन्। उनले बजेट वितरणसम्बन्धी सरकारको दृष्टिकोण स्पष्ट गर्नुपर्ने आवश्यकता रहेको उल्लेख गरेकी छन्।
