काठमाडौं-
श्रम संस्कृति पार्टीका अध्यक्ष हर्क साम्पाङले प्रतिनिधि सभा बैठकमा आफूलाई दिइएको समयप्रति असन्तुष्टि जनाउँदै लामो मन्तव्य राख्ने इच्छा व्यक्त गरेका छन् ।
प्रतिनिधिसभाको नयाँ अधिवेशन आजबाट सुरु हुँदैछ । पहिलो बैठकमा शीर्ष नेताहरूले सम्बोधन गर्ने कार्यसूची तय गरिएको छ । शुभकामना मन्तव्यका लागि दलहरूको सांसद सङ्ख्याको आधारमा समय बाँडफाँट गरिएको छ, जसअनुसार श्रम संस्कृति पार्टीलाई ७ मिनेट समय छुट्याइएको छ ।
सोही पार्टीबाट अध्यक्ष साम्पाङले नै सम्बोधन गर्ने तयारी रहेको छ । तर उनले सामाजिक सञ्जालमार्फत आफूलाई दिइएको समय पर्याप्त नभएको संकेत दिएका छन् ।
‘७ मिनेट मात्रै बोल्न दिने भन्ने खबर आयो । ७ मिनेट होइन १ घण्टा ७ मिनेट बोल्न मन छ,’ उनले उल्लेख गरेका छन् । देशको स्वाधीनता, सम्प्रभुता, नागरिकका पीडा तथा विकासको आकांक्षालाई विस्तृत रूपमा उठान गर्न चाहेको उनको भनाइ छ ।
