काठमाडौँ-
राष्ट्रिय स्वतन्त्र पार्टी (रास्वपा)का सभापति रवि लामिछानेमाथि लगाइएका सम्पत्ति शुद्धीकरण तथा संगठित अपराधसम्बन्धी अभियोग परिमार्जन गर्ने महान्यायाधिवक्ता कार्यालयको निर्णयविरुद्ध दायर गरिएको रिट निवेदनमाथि सर्वोच्च अदालतमा सुनुवाइ भइरहेको छ।
यस विषयमा आइतबार न्यायाधीशद्वय सारंगा सुवेदी र सुनिलकुमार पोखरेलको संयुक्त इजलासमा बहस सुरु भए पनि प्रक्रिया पूरा हुन नसकेपछि मुद्दालाई ‘हेर्दाहेर्दै’मा राखिएको थियो। सोही इजलासमा सोमबार पुनः सुनुवाइ अघि बढाइएको हो।
यसअघि फागुन २७ गते न्यायाधीशद्वय सपना मल्ल प्रधान र श्रीकान्त पौडेलको संयुक्त इजलासले उक्त रिटलाई नियमित प्रक्रियाअनुसार सुनुवाइका लागि अगाडि बढाउन आदेश दिएको थियो।
त्यसअघि माघ ६ गते न्यायाधीश अब्दुल अजीज मुसलमानको एकल इजलासले विपक्षी पक्षसँग कारण माग गर्दै लिखित जवाफ पेश गर्न तथा अन्तरिम आदेश आवश्यक छ कि छैन भन्ने विषयमा छलफलका लागि दुवै पक्षलाई उपस्थित हुन निर्देशन दिएको थियो।
