भरतपुर । काइयी (KAIYI) ब्रान्डका सवारी साधनहरू अब चितवनको नारायणगढ–भरतपुरमा औपचारिक रूपमा उपलब्ध भएका छन्। काइयी नेपालले मध्य नेपालको बजारलाई लक्षित गर्दै आफ्नो सेवा विस्तार गरेको हो। गो अटोमोबाइल्स प्रा.लि.को पहल तथा युरो मोटर्स भरतपुरको समन्वयमा काइयीका सवारी साधनहरू भरतपुरमा उपलब्ध भएका हुन्।
नारायणगढमा काइयीको उपस्थितिसँगै चितवन तथा आसपासका क्षेत्रका ग्राहकहरूले अन्तर्राष्ट्रिय मापदण्डअनुसार सञ्चालन हुने विशेष सुविधा केन्द्रमार्फत सवारी साधन अवलोकन गर्न, व्यावसायिक बिक्री परामर्श लिन तथा भरपर्दो बिक्रीपछिको सेवा प्राप्त गर्न सक्ने कम्पनीले जनाएको छ। यसले मध्य नेपालको अटोमोबाइल बजारमा काइयी ब्रान्डको उपस्थितिलाई अझ मजबुत बनाउने अपेक्षा गरिएको छ।
यस अवसरलाई स्मरणीय बनाउन तथा ग्राहकहरूसँग प्रत्यक्ष अन्तरक्रिया गर्न काइयी नेपालले शनिबार बिहान भरतपुरस्थित चितवन मिडटाउन होटलमा विशेष ईभी लक्षित एक्सचेन्ज क्याम्प आयोजना गर्न लागेको छ। विद्युतीय सवारी साधनप्रति रुचि राख्ने तथा आधुनिक मोबिलिटी समाधानतर्फ अपग्रेड गर्न चाहने ग्राहकहरूलाई लक्षित गरी क्याम्प आयोजना गरिएको हो।
युरो मोटर्सका निर्देशक विकास वर्माका अनुसार क्याम्पमा ग्राहकहरूले कुनै पनि ब्रान्डका सवारी साधन काइयी ब्रान्डका सवारी साधनसँग साट्न सक्नेछन्। कार्यक्रममा काइयीका तीनवटा मोडेल प्रदर्शन गरिनेछ भने म्याक्सस (MAXUS) ब्रान्डको हेभी इलेक्ट्रिक पिकअप सवारी साधन पनि सोही अवसरमा औपचारिक रूपमा सार्वजनिक गरिने उनले जानकारी दिए।
एक्सचेन्ज क्याम्पका क्रममा ग्राहकहरूले काइयीका सवारी साधनहरूको टेस्ट ड्राइभ, बुकिङ, खरिद तथा एक्सचेन्ज गर्न सक्नेछन्। साथै विशेष छुट तथा आकर्षक अफरहरू पनि उपलब्ध गराइने कम्पनीले जनाएको छ। क्याम्प बिहान १०ः३० बजेदेखि सुरु हुने जनाइएको छ।
काइयी ब्रान्डका सवारी साधनहरूले नेपालभर ग्राहकहरूको उल्लेखनीय रुचि पाउँदै आएको कम्पनीको दाबी छ। यसअघि सौराहामा सफलतापूर्वक एक्सचेन्ज क्याम्प सम्पन्न भइसकेको उल्लेख गर्दै कम्पनीले आइतबार कावासोतीमा पनि अर्को एक्सचेन्ज क्याम्प आयोजना हुने जानकारी दिएको छ।
नारायणगढ–भरतपुरमा काइयीको उपलब्धता तथा ग्राहक–केन्द्रित एक्सचेन्ज क्याम्पजस्ता कार्यक्रममार्फत काइयी नेपालले नेपालको विकसित हुँदै गएको अटोमोबाइल बजारमा ग्राहक सन्तुष्टि, नवप्रवर्तन र दीर्घकालीन वृद्धिप्रति आफ्नो प्रतिबद्धता अझ सुदृढ बनाउँदै लगेको जनाएको छ।
