कार्तिक १६, चितवन

Advertisement

उद्योग वाणिज्य संघ चितवनको आसन्न अधिवेशनमा युवा व्यवसायि सिरीष पन्तले अध्यक्ष पदका लागि आफ्नो उम्मेदवारी घोषणा गरेका छन्। पन्तले सामाजिक सन्जाल फेसबुक मार्फत उम्मेदवारी घोषणा गरेका हुन्। 

Advertisement

पन्तले आफ्नो उम्मेदवारी कुनै व्यक्तिगत महत्वाकांक्षा नभई चितवनका सबै व्यवसायीहरूको साझा आवाजका रूपमा रहेको स्पष्ट गर्दै भने, “म केवल पदको लागि होइन, नयाँ सोच, सशक्त युवा नेतृत्व र पारदर्शी संस्थाको निर्माणका लागि तपाईंहरूको साथ माग्दैछु।”

उनले यसपटक सशक्त युवा व्यवसायीहरूको टोलीसहित अघि बढ्ने प्रतिबद्धता जनाएका छन्। उनका अनुसार, उक्त टोलीले बजार व्यवस्थापन सुधार, डिजिटल सदस्य सेवा, व्यवसायी सुरक्षा सुनिश्चितता र स्थानीय उत्पादन प्रवर्द्धनलाई प्राथमिकतामा राख्नेछ।

पन्तले भने, “हामी कृषि, शिक्षा, स्वास्थ्य, पर्यटन र सूचना प्रविधि (आईटी) जस्ता क्षेत्रमा व्यवसाय र समाज दुवैलाई सशक्त बनाउन लक्ष्य राख्छौं।”

चितवनका विभिन्न क्षेत्रहरू— नारायणगढ, रत्ननगर, खैरहनी, राप्ती, माडी र इच्छाकामनाको उल्लेख गर्दै उनले यी सबै क्षेत्रका व्यवसायीहरूको लगानी र श्रमले चितवनको अर्थतन्त्र धानेको बताए। तर पछिल्ला वर्षहरूमा बजारहरू अव्यवस्थित र असन्तुलित बन्दै गएको बताउँदै उनले बजार सुधारका ठोस योजनाहरू प्रस्तुत गरे।

“नारायणगढ बजार आज फोहोर, पार्किङ अभाव, ट्राफिक जाम र अस्तव्यस्त फुटपाथको प्रतीक बनेको छ,” उनले भने, “स्थायी व्यवसायीले कर तिरेर पसल चलाउँदा, फुटपाथमा अनुमति बिना व्यापार गर्ने प्रवृत्तिले असमान प्रतिस्पर्धा सिर्जना गरेको छ। यो समस्या केवल नारायणगढमा होइन, सम्पूर्ण चितवनका बजारहरूमा समान रूपमा देखिएको छ।”

पन्तले स्थायी व्यवसायीको अधिकार सुरक्षित राख्दै फुटपाथ व्यवसायलाई व्यवस्थापन गर्ने, बजार सौन्दर्यीकरण, पार्किङ विस्तार, ट्राफिक सुधार र व्यवसायी–सुरक्षा सहकार्य प्रणाली निर्माण गर्नुपर्ने आवश्यकता औंल्याए।

त्यस्तै, उनले “Made in Chitwan” अभियानमार्फत स्थानीय उत्पादनलाई राष्ट्रिय बजारमा पु-याउने र पर्यटनसँग जोड्ने दीर्घकालीन योजना अघि सार्ने बताए। संघलाई पारदर्शी, समावेशी र नतिजामुखी बनाउने प्रतिबद्धता व्यक्त गर्दै उनले हरेक निर्णय व्यवसायीमैत्री र सहभागीमूलक ढंगले गरिने आश्वासन दिए।

युवा पुस्ताको ऊर्जासँगै अग्रजहरूको अनुभवको सम्मान गर्दै उनले भने, “अग्रजहरूको मार्गदर्शन र नयाँ पुस्ताको जोश मिलाएर मात्रै संघ सशक्त बन्न सक्छ। महिला व्यवसायी, युवा उद्यमी र सबै तहका व्यवसायीलाई नेतृत्वको अवसरका ढोका खुला गर्ने हाम्रो प्राथमिकता हुनेछ।”

पन्तले चितवन महोत्सवको पुनर्जागरण पनि आफ्नो प्राथमिकतामा रहेको बताए। उनका अनुसार, “चितवन महोत्सव कुनै समय जिल्लाको आर्थिक, सामाजिक र सांस्कृतिक गौरवको प्रतीक थियो, तर पछिल्ला वर्षमा पारदर्शिता र उद्देश्यको अभावले यसको विश्वसनीयता घटेको छ। अब समय आएको छ महोत्सवलाई पुनः व्यवसाय, उद्योग र स्थानीय उत्पादन प्रवर्द्धनको केन्द्रका रूपमा फर्काउने।”

उनी भन्छन्, “हामीले धेरै सुनेका छौं— समस्या समाधान हुँदैन, कुरा मात्रै हुन्छ। अब त्यो समय बदलौं, हामी केवल सुन्न होइन, गर्न चाहन्छौं। हाम्रो उद्देश्य पद होइन, परिवर्तन हो।”

चितवनका व्यवसायीहरूप्रति समर्थनको अपिल गर्दै उनले भने, “अब तपाईंको मतले परिवर्तन ल्याउने समय आएको छ। तपाईंको मतदानले युवा नेतृत्वलाई सशक्त बनाउँछ, संघलाई पारदर्शी बनाउँछ, र चितवनका सबै व्यवसायीहरूको भविष्य सुरक्षित बनाउँछ।”

 उनले भने, “अब समय आएको छ हामी सबै मिलेर निर्माण गर्ने — एक पारदर्शी, सशक्त र व्यवसायमैत्री चितवन उद्योग वाणिज्य संघ।”