काठमाडौँ ।
नेपालकै सबैभन्दा ठूलो इन्टरनेट सेवा प्रदायक वर्ल्डलिंक कम्युनिकेसन्स लिमिटेडले पहिलोपटक आफ्नै सङ्ग्रहालय सञ्चालनमा ल्याएको छ । कम्पनीले नेपालको इन्टरनेट विकासको इतिहास र आफैंले तय गरेको यात्रालाई सम्झन लायक बनाउने उद्देश्यले यो सङ्ग्रहालयको सुरुवात गरेको हो । सोमबारदेखि ललितपुरको कुसुन्तीस्थित आफ्नै केन्द्रीय कार्यालयमा रहेको यो सङ्ग्रहालय सर्वसाधारणका लागि खुला गरिएको छ।
सङ्ग्रहालयमा वर्ल्डलिंक स्थापना भएदेखि हालसम्म प्रयोगमा आएका थुप्रै प्रविधि र उपकरणहरू राखिएका छन्। डायल-अप, भी-स्याट, वायरलेस, केबुल इन्टरनेटदेखि हालको फाइबर-टु-द-होम (FTTH) प्रविधिसम्म प्रयोग भएका ऐतिहासिक उपकरणहरू अवलोकन गर्न सकिन्छ।
यीमध्ये कतिपय प्रविधिहरू अहिले प्रयोगमा नरहे पनि, तिनै प्रविधिहरूले नेपालको इन्टरनेट विस्तारमा महत्त्वपूर्ण भूमिका खेलेको वर्ल्डलिंकले जनाएको छ। कम्पनीको विश्वास छ— यो सङ्ग्रहालय सूचना प्रविधि क्षेत्रमा अध्ययन तथा अनुसन्धान गरिरहेका विद्यार्थी, अनुसन्धानकर्ता, लेखक, इतिहासविद् र सञ्चारकर्मीहरूका लागि उपयोगी स्रोत बन्नेछ।
“हाम्रो प्रयासबाट पुराना प्रविधिहरू बुझ्न र सिक्न चाहने जो-कोहीलाई सहयोग पुग्नेछ,” वर्ल्डलिंकले बताएको छ। साथै, यसले नेपालको इन्टरनेट प्रविधिको क्रमिक विकासलाई बुझ्न भावी पुस्तालाई पनि टेवा पुर्याउने अपेक्षा गरिएको छ।
