काठमाडौं – नेपाल आयल निगमले पेट्रोलियम पदार्थको मूल्य वृद्धि गरेको छ। पेट्रोल, डिजेल, मट्टीतेल, आन्तरिक तथा अन्तर्राष्ट्रिय हवाई इन्धनको मूल्य मंगलबारबाट लागु हुने गरी बढाइएको निगमले जनाएको छ।
निगमका अनुसार पेट्रोलमा प्रतिलिटर ५ रुपैयाँ, डिजेल तथा मट्टीतेलमा प्रतिलिटर ४ रुपैयाँ, हवाई इन्धन (आन्तरिक) मा ७ रुपैयाँ र अन्तर्राष्ट्रिय हवाई इन्धनमा प्रतिकिलो लिटर अमेरिकी डलर ५१ ले मूल्य वृद्धि गरिएको हो।
मूल्य समायोजनपछि काठमाडौं उपत्यकामा पेट्रोलको मूल्य प्रतिलिटर १६५, डिजेल तथा मट्टीतेलको १४९ र हवाई इन्धन (आन्तरिक) को मूल्य प्रतिलिटर १२५ रुपैयाँ पुगेको छ। अन्तर्राष्ट्रिय हवाई इन्धन काठमाडौंका लागि प्रतिकिलो लिटर $952 कायम गरिएको छ।
इण्डियन आयल कर्पोरेसनबाट बढेर प्राप्त भएको नयाँ खरिद मूल्यका कारण निगमको लागत बढेको र मूल्य समायोजन गर्नुको विकल्प नरहेको निगमको दाबी छ। स्वचालित मूल्य प्रणालीअनुसार असार १७ गते (१ जुलाई २०२५) राति १२:०१ बजेबाट नयाँ मूल्य लागू हुनेछ।
यद्यपि खाना पकाउने एलपी ग्यासको मूल्य भने यथावत् राखिएको छ।
