चितवन – प्रेस सेन्टर चितवनले दसबुँदे माग राख्दै आइतबार जिल्ला प्रशासन कार्यालय चितवन र भरतपुर महानगरपालिकामा ज्ञापनपत्र बुझाएको छ । प्रेस सेन्टर नेपालको केन्द्रीय कार्यालयको घोषित कार्यक्रमअनुसार प्रेस सेन्टर चितवनको टोलीले ज्ञापनपत्र बुझाएको हो ।
प्रेस सेन्टरका केन्द्रीय, प्रदेश, जिल्ला र महानगर समितिका सदस्यहरुले सहायक प्रमुख जिल्ला अधिकारी चुडामणि गौतमलाई ज्ञापनपत्र बुझाएको थियो । ज्ञापनपत्र बुझ्दै सहायक प्रमुख जिल्ला अधिकारी चुडामणि गौतमले आइतबार नै यसलाई सूचना, सञ्चार एवम् प्रविधि मन्त्रालयमा पठाउने प्रतिबद्धाता व्यक्त गरे ।
यसैगरी, भरतपुर महानगरपालिकाका उपप्रमुख चित्रसेन अधिकारीलाई पनि ज्ञापत्रपत्रका साथै काठमाडौँ घोषणापत्र बुझाइएको थियो । ज्ञापनपत्र बुझ्दै उपप्रमुख अधिकारीले आवश्यक मागलाई नगर प्रमुखसँग छलफल गरी सम्बोधन गर्ने प्रतिबद्धता व्यक्त गरे ।
परिवर्तनका लागि कलम चलाएकै कारण तत्कालीन राज्यबाट हत्या गरिएका महान् सहिद कृष्ण सेन ‘इच्छुक’ सहितका पत्रकारका हत्यारालाई कानुनी दायरामा ल्याउन र राज्यबाट बेपत्ता पारिएका पत्रकारहरु दीपेन्द्र शर्मा (दण्डपाणि न्यौपाने), मिलन नेपाली, चित्रनारायण श्रेष्ठ, राजेन्द्र ढकालको अवस्था तत्काल सार्वजनिक गर्न माग गरिएको छ ।
एभिन्यूज टेलिभिजनका पत्रकार सुरेश रजकको हत्यामा संलग्न कथित राजावादी समूहका नाइकेहरुलाई कानुनी कारबाही गर्न र पत्रकार रजकलाई सहिद घोषणा तथा परिवारलाई उचित राहत प्रदान गर्न माग गरिएको छ ।
संविधान कार्यान्वयनका लागि बन्नुपर्ने सञ्चार नीतिहरु अहिले पनि सरकारको प्राथमिकतामा नपरेकाले तत्काल संविधानको भावनाअनुसार पूर्ण प्रेस स्वतन्त्रतामैत्री कानुन निर्माण गर्न ज्ञापनपत्रमा आग्रह गरिएको छ ।
श्रमजीवी पत्रकार ऐन, २०५२ को पूर्ण कार्यान्वयन गर्न र न्यूनतम पारिश्रमिक निर्धारण समितिले सिफारिस गरेको न्यूनतम पारिश्रमिक तत्काल लागू गर्न माग गरिएको छ ।
पत्रकारको दक्षता अभिवृद्धिका लागि गठन गर्ने भनिएको आमसञ्चार प्रशिक्षण प्रतिष्ठान तत्काल गठन गर्न, पत्रकार वृत्ति कोषको कार्यान्वयनका लागि जारी गरिएको मापदण्ड तत्काल परिमार्जन गरेर ज्येष्ठ पत्रकारले सहज ढंगले वृत्तिकोषबाट लाभ लिन सक्ने प्रबन्ध गर्न ध्यानाकर्षण गर्दैै ज्ञापनपत्र बुझाइएको हो । ज्ञापनपत्रमा पूर्ण प्रेस स्वतन्त्रताको ग्यारेण्टी गर्न जोडदार माग गरिएको छ ।
ज्ञापनपत्र बुझाउने कार्यक्रममा प्रेस सेन्टर नेपालका वरिष्ठ उपाध्यक्ष सुरेशचन्द्र अधिकारी, उपाध्यक्ष शान्ता अधिकारी, वागमती प्रदेशका सचिव सुमन गैरे, प्रेस सेन्टर चितवनका कार्यवाहक अध्यक्ष नवीन मरहट्टा, सचिव सुरेन कुँवर, भरतपुर महानगर समितिका अध्यक्ष किशोर चन्द्र सापकोटा, सचिव आयुष न्यौपानेलगायतको उपस्थिति रहेको थियो ।
