चितवन-राष्ट्रिय स्वतन्त्र पार्टी (रास्वपा)ले चितवनबाट ‘जनयात्रा’ शुभारम्भ गरेको छ । पार्टीको केन्द्रीय समितिको बैठकको निर्णय अनुसार शनिबार चितवनबाट पार्टीका उपसभापति डा स्वर्णिम वाग्ले, जनयात्रा संयोजक बिराजभक्त श्रेष्ठ, सांसद हरि ढकाल, केन्द्रीय सदस्य ध्रुव गिरी, राजन गौतम लगायतले घण्टी बजाएर जनयात्रा शुभारम्भ भएको घोषणा गरेका हुन् ।
आज कार्यक्रमको शुभारम्भमा सभापति रवि लामिछानेको उपस्थिति रहने भनिएपनि उनी सहकारी ठगी प्रकरणमा अदालतको आदेशअनुसार शुक्रबार नै पक्राउ परेका थिए । उनी पक्राउ परेपनि जनयात्रालाई जारी राख्ने गएराति बसेको रास्वपा केन्द्रीय सचिवालयको निर्णयअनुसार पार्टीका उपसभापति स्वर्णिम वाग्लेसहितका नेता कार्यकर्ताले घण्टी बजाउँदै शुभारम्भ गरेका हुन् ।
यो अभियान भ्रष्टाचार, कुशासन र अन्यायविरुद्ध गाउँ–गाउँ र बस्ती–बस्तीमा पुग्ने उद्देश्यले हुन लागेको रास्वपाको भनाई छ । जनयात्रा शुभारम्भ कार्यक्रममा नेताहरु बोलिरहेका छन् ।
