चितवन – नेकपा (माओवादी केन्द्र) को जनतासँग माओवादी : तराई–मधेश हुलाकी मार्ग जागरण अभियान अन्तर्गत भोलि चैत ९ गते भरतपुर महानगरपालिका–२३, कसराचोकमा जागरण सभा आयोजना हुँदैछ । उक्त जागरण सभामा २० हजार कार्यकर्तालाई सहभागी गराउने तयारी भएको छ ।
माओवादी केन्द्रका अध्यक्ष पुष्पकमल दाहाल प्रचण्डबाट सम्बोधन हुने उक्त जागरण सभालाई भव्यरुपमा सफल पार्न माओवादी केन्द्र, जिल्ला पार्टी कार्यालयमा वडास्तरीय कमाण्ड बैठक बसेर तयारी गरिएको हो ।
नेकपा (माओवादी केन्द्र) भरतपुर महानगर समितिका अध्यक्ष ईश्वर सापकोटा सुमनले जागरण सभा चैत ९ गते शनिबार कसराचोकमा बिहान १२:३० बजे आयोजना हुने जानकारी दिए । उनले वडास्तरीय कमाण्ड बैठकबाट विभिन्न जिम्मेवारी बाँडफाँट समेत गरिएको बताए ।
नेकपा (माओवादी केन्द्र) का केन्द्रीय सदस्य एवं अनुगमन, अनुशासन र मूल्यांकनसमिति बागमती प्रदेश ईन्चार्ज ईश्वरी भट्टराईले जागरणसभालाई भव्यरूपमा सम्पन्न गर्न सम्पूर्ण तयारी पूरा भएको जानकारी दिए ।
यस्तो छ, प्रचण्डको कार्यतालिका
चैत ८ गते चितवन आउने
चैत ८ गते बेलुका ४ बजे ठोरीबाट प्रस्थान
चैत ८ गते बेलुका ६ बजे माडी मगुईमा, नेकपा माडी नगरसमितिको स्वागत कार्यक्रम
चैत ८ गते राती माडी कृष्णनगरमा बास बस्ने
चैत ९ गते
– बिहान ७ बजे मर्निङ वाक गर्दै देबेन्द्रपुर आउने
– वसन्तपुरमा शहिदहरुको शालिक र माल्यार्पण
– माडी वसन्तपुर क्याम्पसमा दिवाकर भुसालको शालिकमा माल्यापर्ण
– रमाइलो डाँडा हुँदै एकता स्तम्भ हुँदै थारु गाउँ चिरौलीमा खाना खाने
– बिहान ११ बजे बरुवामा कोण सभा
– १२:३० बजे कसरामा जागरणसभा
