भरतपुर,पुस २०-
उद्योग वाणिज्य संघचितवनको इतिहासमा नै पहिलोपटक उपाध्यक्ष पदमा महिलाको उम्मेदवारी परेको छ । संघको ५७ औँ वार्षिक साधारणसभा एवं अधिवेशनबाट हुने नयाँ नेतृत्वका लागि उपाध्यक्ष पदमा पहिलो पटक महिलाको उम्मेदवारी परेको हो ।
यही पुस २१ र २३ गते हुने उद्योग वाणिज्य संघको निर्वाचनमा वाणिज्यतर्फको उपाध्यक्षमा व्यवसायी रजनी मास्केको उम्मेदवारी परेको हो । लगातार छ कार्यकाल उद्योग वाणिज्य संघको कार्यसमिति सदस्य रहनुभएकी मास्केले यसपटक उपाध्यक्षमा उम्मेदवारी दिनुभएको हो । “अघिल्लो कार्यसमितिमा उपाध्यक्ष बन्ने इच्छा जाहेर गरेको भए पनि विभिन्न कारणले पछि हटेँ” भरतपुरमा बिहीबार आयोजित पत्रकार सम्मेलनमा उहाँले भन्नुभयो, “छ सय भन्दा बढी सदस्य रहेको संस्थामा महिलाको नेतृत्व हुनुपर्छ भनेर उपाध्यक्षमा उम्मेदवारी दिएको हुँ ।”
उद्योग वाणिज्य संघ चितवनमा २५ सदस्य अधिवेशनबाट निर्वाचित हुने भए पनि सदस्यबाहेकका पदमा महिला सहभागिता शून्य भएकाले पनि उपाध्यक्षमा आफूले उम्मेदवारी दिएको उहाँको भनाइ छ । “सबै सदस्यहरुलाई राम्रो गरेको छु, कसैलाई पनि नराम्रो गरेको छैन” उहाँले भन्नुभयो, “त्यही नै हो मेरो जित्ने आधार ।” २०४५ सालमा मास्के पुस्तक पसलबाट व्यवसायिक यात्रा सुरु गर्नुभएकी मास्के अहिले सरोजनी बुक हाउस तथा सरोज पुस्तक भण्डारको सञ्चालक हुनुहुन्छ ।
मास्के २०६८–७० मा उद्योग वाणिज्य संघका कार्यसमितिमा मनोनित सदस्य भएर प्रवेश गरेसँगै त्यसपछिका हरेक निर्वाचनमा निर्वाचित भएर कार्यसमितिमा रहनुभएको थियो । “मलाई ६ पटकसम्म संस्थापनले साथ दिएर कार्यसमिति सदस्य बनाएर लिएर गयो” उहाँले भन्नुभयो, “तर, यसपटक उपाध्यक्षमा चाहना राखेपछि म स्वतन्त्र उम्मेदवारको रुपमा उवासंघको चुनावी मैदानमा होमिएकी छु ।” आफू महिला भएकै कारण संस्थापनको तर्फबाट उपाध्यक्षमा अटाउन नसकेको मास्केको भनाइ छ ।
अबको कार्यकाल कार्यसमितिको उपाध्यक्षमा रहेर अझै संघको गरिमा बढाउने र उद्योगी व्यवसायीहरुको हितमा काम गर्ने सोचमा रहेको उहाँले बताउनुभयो ।
महिलाहरुलाई उद्यमी बनाएर आयआर्जनको बाटोमा अगाडि बढाउने आफ्नो इच्छा भएको भन्दै उहाँले आवश्यक तालिम, न्यून ब्याजमा बैंकबाट ऋणको व्यवस्था, महिला उद्यमीका उत्पादन बजारीकरणका लागि प्रभावकारी देखिएको कोसेली घरलाई अझ सशक्त बनाउनका लागि उम्मेदवारी दिएको बताउनुभयो । आफू निर्वाचित भएमा समग्र चितवन जिल्लाको सामाजिक, आर्थिक विकास तथा लगानीको वातावरण सिर्जना गर्न पहल गर्ने उहाँले प्रतिबद्धता जनाउनुभयो ।
व्यवसाय कर, घरबहाल कर, विज्ञापन करलगायतका कर, राजस्व तथा अन्तःशुल्क सम्बन्धी समस्या समाधानको लागि पहल गर्ने भन्दै उहाँले व्यवसायी सदस्यहरुसँग अन्तरक्रिया गरेर उनीहरुको आवश्यकता अनुसारका कार्यक्रम आयोजना गर्ने बताउनुभयो । संघमा वस्तुगत संघहरुको प्रतिनिधित्व वृद्धि गर्दै, वस्तुगत संघहरुको सचिवालय व्यवस्थापना गर्न पहल गर्ने उहाँको भनाइ छ । उद्यमशीलता अवधारणा अनुसार महिलाहरुले गर्ने उद्यमसम्बन्धी क्रियाकलापलाई पहिलो प्राथमिकतामा राख्ने भन्दै उहाँले महिला उद्यमी तथा घरेलु, साना तथा लघुउद्यमीद्वारा उत्पादित वस्तुहरुको प्रवद्र्धनमा सहयोग गर्ने प्रतिबद्धता जनाउनुभयो ।
