चितवन : सरोज खनालको डेब्यू निर्देशनमा नायक खनाल र नायिका करिष्मा मानान्धर स्टारर फिल्म बगानको प्रचारका लागि टोली चितवन आइपुगेको छ । असार २९ गतेबाट देशैभर प्रदर्शन हुन लागेको पिल्म ‘बगान’को निर्माण पक्ष चितवन आइपुगेको छ । प्रचारप्रसारका लागि चलचित्र निर्माण टोली शनिबार चितवन आइपुगेको हो । यहाँ आयोजित पत्रकार सम्मेलनमा चलचित्र ‘बगान’ एकल महिलाले निःशुल्क हेर्न पाउने छन् जानकारी दिइयो । एकल महिलाले परिचय पत्र देखाएपछि यो फिल्म हेर्न कुनै शुल्क तिर्नुपर्ने छैन ।
कार्यक्रममा बोल्दै चलचित्र निर्देशकसमेत रहेका नायक सरोज खनालले एकल महिलाले कार्ड लिएर हलमा गएमा शुल्क नलाग्ने जानकारी दिए । हरेक घरका महिलाको दुःख, समस्या र त्यसको समाधानसहितको कथावस्तु समेटिएको फिल्म प्रदर्शन गर्न लागेको खनालले जानकारी दिए । एकताकाका नम्बर एक नायक लामो समयसम्म चलचित्रमा अभिनय गरेका खनालले ‘बगान’बाट निर्देशनमा डेब्यू गरेका हुन् ।
पत्रकार सम्मेलनमा बोल्दै चलचित्रमा विधवाको भूमिका निभाएकी नायिका करिष्मा मानन्धरले ‘बगान’ले फिल्म क्षेत्रमा क्रान्ति ल्याउने बताइन् । सन्देशमूलक चलचित्र बनेकोले हलसम्म आएर हेरिदिन उनले सञ्चारकर्मीमार्फत आमदर्शकलाई आग्रह गरेकी छिन् ।
फिल्ममा करिष्माको छोरीको भूमिका निभाएकी नव कलाकार प्रमिला कार्कीले निर्देशक खनाल र नायिका करिष्मासँग काम गर्ने अवसर पाएकोमा खुशी लागेको बताइन् । फिल्ममा काम गर्ने क्रममा आफूले विश्वविद्यालयमा नै प्रवेश पाएकोजस्तो अनुभव भएको उनले जिकिर गरिन् । सुरेश वाग्लेको निर्माणमा बनेको फिल्ममा निर्देशक खनाल, करिश्मा मानन्धर, आकाश श्रेष्ठ, नीर शाह, वसुन्धरा भुसाल लगायतका कलाकारको अभिनय रहेको छ । फिल्ममा सरोज खनालले विधवाका प्रेमीको भूमिका निभाएका छन् ।
