चितवन ।
चितवनका चार जना जेष्ठ पत्रकारलाई निवृत्तिभरण प्रदान गरिएको छ । भरतपुर महानगरपालिका र नेपाल पत्रकार महासंघ चितवनको साझेदारीमा चार जना जेष्ठ पत्रकारलाई आज (मंगलबार) चेक हस्तान्तरण गरी निवृत्तिभरण प्रदान गरिएको हो ।
निवृत्तिभरण प्राप्त गर्ने जेष्ठ पत्रकारहरु महेन्द्र श्रेष्ठ, रेशम विरही, डिआर पोखरेल र मोहन पोखरेल रहेका छन् । उनीहरु ६० वर्ष पार गरेका जेष्ठ पत्रकार हुन् । नेपाल पत्रकार महासंघ चितवनका अध्यक्ष नारायण अधिकारीले पत्रकारिता गरेको २० वर्ष पूरा भई ६० वर्ष कटेका ज्येष्ठ पत्रकारलाई निवृत्तिभरण प्रदान गरिएको बताए । जेष्ठ पत्रकारलाई निवृत्तिभरण बैशाख महिनाबाटै सुरु गरिएको हो ।
भरतपुर महानगरपालिका प्रमुख रेनु दाहाल र उपप्रमुख चित्रसेन अधिकारीले संयुक्त रुपमा महासंघका अध्यक्ष अधिकारीलाई अक्षयकोषका लागि २० लाख रुपैयाँको चेक हस्तान्तरण गरेका थिए । अबदेखि चितवन शाखामा आवद्ध ज्येष्ठ पत्रकार ६० वर्ष पुगेका २० वर्ष पत्रकारिता गरेकाले मासिक चार हजारका दरले निवृत्तिभरण प्राप्त गर्ने भएका छन् ।
स्थानीयस्तरमा निवृत्तिभरण प्रदान गर्ने देशभरमै चितवन जिल्ला पहिलो भएको प्रमुख दाहालले दावी गरिन् । संचार क्षेत्रलाई पहिलेदेखि नै सक्दो सहयोग गर्दै आएको उनको भनाइ थियो । कार्यक्रममा विभिन्न संघसंगठनका प्रमुख सहित ५० बढी पत्रकारहरुको उपस्थिति रहेको थियो ।
