बैशाख २२, चितवन । सत्ता गठबन्धनले चितवनको भरतपुरमा संयुक्त चुनावी आमसभा गरिरहेको छ । आमसभालाई सम्बोधन गर्न प्रधानमन्त्री तथा नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल लगायतका शीर्ष नेता भरतपुर महानगरपालिकाको हाकिमचोक पुग्नुभएको छ ।
गठबन्धनका तर्फबाट संयुक्त उम्मेदवार बन्नुभएकी माओवादी केन्द्रकी नेत्री रेनु दाहालको पक्षमा मत माग्न र नेपाली कांग्रेसको समर्थन रहेको देखाउन आमसभा भइरहेको हो । आमसभालाई सम्बोधन गर्दै कांग्रेस चितवनका पूर्वसभापति जितनारायण श्रेष्ठले रेनु दाहाललाई जिताउने विषयमा अहिले चितवन कांग्रेस एकजुट भएर लागेको बताउनुभयो ।
उहाँले राष्ट्रिय आवश्यकताअनुसार भरतपुर महानगरपालिकामा संयुक्त गठबन्धनका सबै उम्मेदवारलाई जिताउने भन्दै माओवादीले भोलिका दिनमा भने धोका दिन नपाउने बताउनुभयो ।
‘अघिल्लो चुनावमा यसैगरी आमसभा गरेर हामीले माओवादी उम्मेदवारलाई जितायौँ तर तीन महिनापछि माओवादी अध्यक्ष प्रचण्ड अर्कै पार्टीसँग मिलेर धोका दिनुभयो । हाम्रो सभापति सोझो हुनुहुन्छ, प्रचण्डजी ! भोलिका दिनमा धोका दिने काम नहोस्’, श्रेष्ठले भन्नुभयो ।
