बैशाख ०५, चितवन । कालिका स्पोर्ट्स एकेडेमीलाई हराउँदै महेन्द्र ट्र्याक्टर पटिहानी एफसी स्वर्गीय विशाल गुरुङ स्मृति कप फुटबलको क्वाटरफाइनलमा प्रवेश गरेको छ । आज (सोमबार) भएको खेलमा पटिहानीले कालिका स्पोर्ट्सलाई २-१ ले पराजित गरेको हो ।भरतपुर १९ स्थित शारदानगर माविको मैदानमा भएको खेलमा पटिहानीलाई जिताउन दुबै गोल रितेश क्षेत्रीले गरे । कालिकाका मनिष तामाङले एक गोल फर्काए ।
खेलको २९ औं मिनेटमा रितेशले गोल गर्दै पटिहानीलाई सुरूवाती अग्रता दिलाए । तर ४६ औं मिनेटमा कालिकाका मनिषले बराबरी गोल फर्काए ।
७२ औं मिनेटमा पटिहानीले पेनाल्टी पायो । प्राप्त अवसरलाई सदुपयोग गर्दै रितेशले पटिहानीलाई जित दिलाए । रितेश नै म्यान अफ दि म्याच चुनिए ।
अब सेमिफाइनल प्रवेशका लागि पटिहानीले हर्दी युवा समाजको सामना गर्नेछ । हर्दी बाई पाउदै यस अघि नै सेमिफाइनल प्रवेश गरिसकेको छ ।
प्रतियोगितामा मंगलबार पनि एक खेल हुनेछ । मंगलबार सेन्ट्रल कलेज एभरेस्ट फुटबल क्लब र टाइगर युवा क्लब भिड्ने आयोजक रामपुर फुटबल क्लब रड्सका महासचिव देउकुमार थापाले जानकारी दिए ।
रामपुर र शारदा युवा क्लबको संयुक्त आयोजनामा जारी प्रतियोगितामा १२ टोली सहभागी छन् । बैशाख १५ गतेसम्म प्रतियोगिताको विजेताले एक लाख र उपविजेताले ५० हजार प्राप्त गर्नेछ ।
