चैत्र १४, चितवन ।चितवन र तनहुँ जिल्लामा पर्ने चर्चित धार्मिकस्थल देवघाटमा तीनमुखे पुल (ट्रिज) बन्ने भएको छ ।देवघाटमा तीन जिल्ला (चितवन, नवलपुर र तनहुँ) लाई जोड्ने गरी देवघाट ट्रिज आयोजना बन्ने भएको हो । देवघाट क्षेत्र विकास समितिका कार्यकारी धिरनबाबु घिमिरेका अनुसार पुल छिटोभन्दा छिटो निर्माण गर्नका लागि देवघाट क्षेत्र विकास समिति लागिरहेको छ । उनले समितिका पूर्वअध्यक्ष टंकनाथ पौडेलको संयोजकत्वमा त्रिकोणात्मक पुल कार्यान्वयन समिति पनि निर्माण गरिएको नारायणी अनलाइनलाई बताए । उनले भने, ‘ स्थानीय आवश्यकताले भन्दा पनि धार्मिक पर्यटनलाई आकर्षण गर्नको लागि पुल निर्माण गर्न लागिएको हो । भारतको हरिद्वार जस्तै नेपालको देवघाट क्षेत्रको वैभव र सभ्यता जोगाउँदै धार्मिक पर्यटकको संख्या बढाउन पनि यो पुल आवश्यक छ । ’ उनले पुलको डीपीआर तयार भएर बजेटको पर्खाइमा रहेको जानकारी दिए ।
संघीय मामिला तथा सामान्य प्रशासन मन्त्रालयमातहतका स्थानीय पूर्वाधार विभागबाट कार्यान्वयन हुने यो आयोजनाको अनुमानित लागत ६३ करोड रुपैयाँ रहेको छ । विभागले यो आयोजनाको विस्तृत वातावरणीय प्रभाव मूल्यांकन प्रतिवेदन वन तथा वातावरण मन्त्रालयमा पेस गरेको छ । यसअघि यस्तो डिजाइनको पुल गुल्मी, पाल्पा र स्याङ्जालाई जोड्ने गरी रिडी क्षेत्रमा बनिरहेको छ । यस्तो संरचना निर्माण हुने दोस्रो गन्तव्य देवघाट बन्ने भएको छ । यी दुई क्षेत्र धार्मिक दृष्टिकोणबाट नेपालका चर्चित गन्तव्यमा पर्छन् ।
देवघाटमा त्रिशुली नदी र कालीगण्डकी नदीको दोभान क्षेत्रमा आयोजना बन्ने भएको छ । अहिले यस क्षेत्रमा रहेका तीन जिल्लालाई एक साथ जोड्ने अर्को संरचना छैन । चितवनको भरतपुर महानगरपालिका र तनहुँको देवघाट गाउँपालिकालाई त्रिशुली नदीमाथिको झोलुंगे पुलले जोड्छ ।
यता, गैंडाकोट नगरपालिकाको कैलाडी र हर्दी क्षेत्र भने जोडिएको छैन । यस्तो तीन मुखे पुलले तीन जिल्लालाई एक साथ जोड्ने प्रतिवेदनमा उल्लेख छ । यसले सो भेगको धार्मिक तथा आर्थिक गतिविधिमा समेत वृद्धि हुने आयोजनाको दाबी छ । आयोजनाको कुल लागत ६३ करोड ३५ लाख ७५ हजार ५४० रुपैयाँ अनुमान गरिएको छ । यो पुलको आयु १०० वर्ष रहने रहने गरी डिजाइन गरिएको प्रतिवेदनमा उल्लेख छ । पर्यटकका लागि बनाइने भए पनि यस पुलले तीन जिल्लाका स्थानीयलाई पनि ओहोरदोहोर गर्न सहज हुने देवघाट क्षेत्र विकास समितिको विश्वास छ ।
