फागुन ०१, चितवन ।विश्व हिन्दू युवा संघको प्रथम राष्ट्रिय भेला हुने भएको छ । चितवनको देवघाटस्थित बागेश्वेरी आश्रममा फागुन ८, ९ र १० गते राष्ट्रिय भेला हुने आज (आइतबार) आयोजित पत्रकार सम्मेलनमार्फत जानकारी गराईएको छ ।
भेलामा आगामी योजना र यस अघिका कार्यहरुको समिक्षा हुने संघका केन्द्रीय अध्यक्ष ॠषिकेश जंग शाहले जानकारी दिए । भेलाले योगी नरहरिनाथले स्थापना गर्न खोजेको पञ्चभाषा विश्वविद्यालय सञ्चालनका लागि आवश्यक निर्णय र तयारी समितिहरु निर्माण गर्ने शाहले बताए ।
भेलाले गोरक्षा, गाई र गाँजाको संरक्षण तथा सम्वर्द्धन गर्दै देशव्यापी अभियान सञ्चालन गरेर समृद्ध गुरु राष्ट्र निर्माण सफल बनाउनका लागि पहल गर्नेछ । यस्तै देशभर रहेका मौलिक मठ, मन्दिर, धर्म, संस्कार, संस्कृति, मौलिक ज्ञान तथा सिपहरुको रक्षा र विज्ञान प्रविधिसँग जोड्दै समृद्ध राष्ट्र निर्माणका लागि समेत पहल गरिने उनले बताए ।
मौलिक शिक्षाका लागि रैथाने विश्वविद्यालय, वास्तुकला विश्वविद्यालय, पञ्चगब्य अध्ययन अनुसन्धान केन्द्र, गोरक्षानाथ विश्वविद्यालय स्थापना र सञ्चालन तथा लिपुलेक कलापानी क्षेत्रमा व्यासधाम निर्माणका लागि पनि भेलाले पहल गर्नेछ ।
भेलाबाट एक हजार केन्द्रीय समिति थप गरेर परिचालन गरिने समेत शाहले जानकारी दिए । उनका अनुसार चितवनका घर घरमा ॐ को झन्डा राखेर भेलाको स्वागतका लागि आह्वान गरिनेछ ।
चितवनबाट राजनीतिक तथा धार्मिक तरंग पैदा हुने भएकोले प्रथम राष्ट्रिय भेला चितवनमा आयोजना गरिएको संघका जिल्ला अध्यक्ष प्रेम गैरेले बताए । केही समयमा नै हिन्दूवादी आन्दोलन समेत गरिने उनले बताए । हिन्दू राष्ट्र कायमका लागि सरकारलाई दबाब दिइने उनको भनाइ थियो । भेलामा पाँच सय प्रतिनिधिहरु सहभागि हुने बताईएको छ ।
