माघ २७, चितवन ।चितवनमा कोरोना भाइरसको सक्रिय संक्रमितको संख्या ओरालो लाग्दै गएको छ । पछिल्ला केही दिनयता दैनिक निको हुनेको संख्या बढ्दै गएसँगै सक्रिय संक्रमित घट्न थालेका हुन् ।
जिल्लाभर हाल सक्रिय संक्रमितको संख्या दुई हजार भन्दा पनि तल झरिसकेको छ । स्वास्थ्य कार्यालय चितवनका अनुसार आज (बिहीबार) सक्रिय संक्रमितको संख्या घटेर एक हजार आठ सय ६३ पुगेको छ ।
सक्रिय संक्रमित मध्ये ९८ प्रतिशत होम आइसोलेसनमा छन् । स्वास्थ्य कार्यालयको तथ्याङ्क अनुसार एक हजार आठ सय २९ जना होम आइसोलेसनमा छन् । बाँकी ३४ जना भने अस्पतालमा रहेका छन् ।
पछिल्लो २४ घण्टामा मात्रै तीन सय २१ जना संक्रमित निको भएका छन् । यससँगै हालसम्म कोरोनामुक्त हुनेको संख्या ३१ हजार १७ पुगेको छ ।
यता पछिल्लो २४ घण्टामा ४१ जना नयाँ संक्रमित थपिएका छन् । चार सय ७० पिसिआर परीक्षणबाट २३ तथा ४४ एन्टिजेन परीक्षणबाट १८ जनामा कोरोना पुष्टि भएको हो । यससँगै कुल संक्रमितको संख्या ३३ हजार तीन सय २५ पुगेको छ ।
कुल संक्रमित मध्ये एक दशमलव ३३ प्रतिशत अर्थात चार सय ४५ जनाले ज्यान गुमाएका छन् । पछिल्लो २४ घण्टामा मात्रै एक जनाको कोरोना संक्रमणबाट ज्यान गएको छ । उनी भरतपुर महानगरपालिकाका संक्रमित हुन् ।
५४ हजार बढीले लगाए मोडेर्ना खोप
चितवनमा १२ देखि १७ वर्ष उमेर समूहका ५४ हजार भन्दा बढी विद्यार्थीले कोरोना भाइरसविरुद्धको मोडेर्ना खोप लगाएका छन् । बुधवारसम्म जिल्लाभरका विद्यालयमा ५४ हजार ६ सय ५२ जनलाई कोरोनाविरुद्धको खोप दिईएको छ ।
स्वास्थ्य कार्यालयका अनुसार भरतपुर महानगरपालिका भित्रका ३१ हजार सात सय ९१ जना विद्यार्थीले कोरोनाविरुद्धक्को खोप लगाएका छन् । यस्तै खैरहनी नगरपालिकाका चार सय ८४, माडीका तीन हजार एक सय १४, रत्ननगरका आठ हजार सात सय १६ तथा राप्तीका चार हजार ६ सय ४३ जना विद्यार्थीले खोप लगाएका छन् ।
कालिकाका तीन हजार ६ सय ५२ तथा इच्छाकामना गाउँपालिकाका दुई हजार दुई सय ५२ जना विद्यार्थीले खोप लगाएको स्वास्थ्य कार्यालयले जानकारी दिएको छ । चितवनमा २३ गतेदेखि १२ देखि १७ वर्ष उमेर समूहका विद्यार्थीलाई खोप लगाउन थालिएको हो । २५ गतेसम्म चल्ने भनिएको खोप अभियान तीन दिन थप गरिएको छ । अब २८ गते शुक्रबारसम्म नै खोप अभियान सञ्चालन हुनेछ ।
