पौष १९, चितवन ।चितवनमा माघ पहिलो सातादेखि विद्यालयमा नै खोप अभियान चलाइने भएको छ । यस अघि पौष दोस्रो सातादेखि नै चल्ने भनिएको अभियान फाईजरको खोप समयमा नै नआउँदा स्थगित भएको थियो ।अहिले काठमाडौंमा खोप आइसकेको छ । काठमाडौंमा खोप आएसँगै चितवनमा माघ पहिलो साताबाट खोप अभियान चलाउने तयारी गरिएको हो । काठमाडौंमा खोप आइसकेको भए पनि विद्यालयमा परीक्षा चलिरहेकोले खोप अभियान माघमा सारिएको हो ।स्वास्थ्य कार्यालय चितवनकी तथ्याङ्क अधिकृत गीताञ्जली ढकालका अनुसार १२ वर्षदेखि १७ वर्ष उमेर समूहका विद्यार्थीहरुलाई विद्यालयमा नै खोप दिइनेछ । यो उमेर समूहका ८५ हजार विद्यार्थीलाई खोप दिइने ढकालले जानकारी दिईन् ।

यसका लागि विद्यालयमा नै खोप केन्द्र स्थापना गरिनेछ । दुई सय भन्दा कम विद्यार्थी भएका विद्यालयलाई मर्ज गरेर एउटै खोप केन्द्र बनाइनेछ । दुई सय भन्दामाथि विद्यार्थी रहेका विद्यालयको हकमा भने सोही विद्यालयमा खोप केन्द्र बनाइने उनले बताईन् ।

यो अभियान स्थानीय तह स्तरबाट सञ्चालन हुनेछ । यस लागि सम्बन्धित स्थानीय तहले स्वास्थ्यकर्मी परिचालन गर्ने स्वास्थ्य कार्यालयकी तथ्याङ्क अधिकृत ढकालले जानकारी दिईन् । जिल्लाका स्वास्थ्यकर्मीहरुलाई भाईजरको खोप सम्बन्धि तालिम दिईसकिएको उनले बताईन् ।

काठमाडौंबाट माघ पहिलो साता भित्रै खोप आइपुग्ने समेत उनले बताईन् । खोप अभियान दुई चरणमा चल्नेछ । खोप समितिको बैठक बसेर मिति तय गरिने उनले जानकारी दिईन् ।