पुस १७, चितवन।
नारायणगढको पुलचोकमा एक कार्यक्रम गरि नवौं राष्ट्रिय पोशाक एवम् ढाका टोपी दिवस मनाइएको छ।
भरतपुर महानगरपालिका र सामाजिक संस्था हेल्प फर हेपिनेसको आयोजनामा भएको उक्त कार्यक्रममा चितवनका दर्जन सामाजिक संस्थाको सहभागीता रहेको थियो। नेपालीको राष्ट्रिय पोशाक दौरा सरुवाल र राष्ट्रिय ढाका टाेपीमा दर्जनौं युवाहरुको सहभागीता रहेको थियो।
कार्यक्रममा भरतपुर महानगरपालिका का नगर शिक्षा प्रशासन अधिकृत महेन्द्र पौडेल प्रमुख अतिथि रहनु भएको थियो।
राष्ट्रिय पोशाक र ढाका टाेपीको सम्मानको लागि युवाहरुले यस्ता कार्यक्रम आयोजना गर्नु पर्ने कुरामा जोड दिदै महानगरपालिकाले पनि यस्ता किसिमका कार्यक्रमलाई प्रोत्साहन दिने कार्यक्रममा प्रमुख अतिथि पौडेलले बताउनु भयो।
कार्यक्रममा अर्का वक्ता महानगर युवा संजाल का संयोजक सन्देश वाग्लले बिदेशी चाड मनाउन हामी सबै लागी परेका छौ तर हाम्रो राष्ट्रिय पहिचान झल्कने खालका सबै खाले राष्ट्रिय दिवस हामीले बिर्सदै गएका हुनाले, नेपालीले हरेक आफ्ना राष्ट्रिय दिवस गौरव का साथ मनाउनु पर्छ र आफ्नो पहिचान गुम्न दिन हुदैन भन्ने कुरा ब्यक्त गर्नु भयो।
उक्त कार्यक्रम हेल्प फर हेपिनेसका संस्थापक अध्यक्ष नविन तिवारीको अध्यक्षतामा र रमन वाग्लेको संयोजनमा सम्पन्न भएको थियो।
