मङ्सिर १८, काठमाडौं ।प्रेस सेन्टर नेपालको चौथो राष्ट्रिय सम्मेलन आजदेखि चितवनमा हुदैछ। मङ्सिर १८ र १९ गते दुई दिन सम्मेलन हुनेछ। सम्मेलनमा ९०० हाराहारी प्रतिनिधि सहभागी हुने छन्।प्रेस सेन्टरका केन्द्रीय कोषाध्यक्ष सुरेशचन्द्र अधिकारीका अनुसार सम्मेलनमा ७७ जिल्ला, उपत्यका, एशोसिएट र प्रतिष्ठानका प्रतिनिधि सहभागी हुने छन्। यसैगरी भारत, अमेरिका, बेलायत, मध्यपूर्वी खाडी शाखाबाट समेत प्रतिनिधि सहभागी हुने उनले जानकारी दिए। राष्ट्रिय सम्मेलनको नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले उद्घाटन गर्ने छन्। सम्मेलनले विधान संशोधनसँगै तीन वर्षका लागि नयाँ नेतृत्व चयन गर्ने छ।

हाल सेन्टरको केन्द्रीय समितिमा २६० सदस्य छन्। अधिकारीका अनुसार विधान संशोधन गरेर यो सङ्ख्या घटाउने तयारी गरिएको छ। सम्मेलनमा सहभागी शुक्रबार आउने छन्। सहभागीलाई भरतपुर र गैँडाकोटका होटलमा राखिने छ। केन्द्रीय समितिका पदाधिकारी एवं सदस्य आजबाटै आउन सुरु गर्ने सेन्टरले जनाएको छ। सेन्टरको तेस्रो सम्मेलन काठमाडौँमा भएको थियो।

पार्टीका अध्यक्ष दाहालको गृह जिल्ला भएकाले सम्मेलन चितवनमा गर्न लागिएको हो। हालै मात्र चितवनमा नेकपा एमालेको १० औँ राष्ट्रिय महाधिवेशन र नेकपा मालेको केन्द्रीय महाधिवेशन सम्पन्न भएको छ। राष्ट्रियस्तरका महाधिवेशन र सम्मेलन यहाँ भएसँगै आर्थिक क्षेत्र चलायमान हुने व्यवसायीले जनाएका छन्।