मङ्सिर ०६,काठमाडौं । नेकपा (एमाले) को १०औँ राष्ट्रिय महाधिवेशन यही मंसिर १० गतेदेखि १२ गतेसम्म भव्य रुपमा चितवनमा हुँदैछ।
उद्घाटन सत्र १० गते नारायणी नदी किनारमा र बन्दसत्र ११ गतेदेखि पर्यटकीय नगरी सौराहामा हुनेछ। महाधिवेशनको तयारीको क्रम चलेसंगै चितवनमा अहिले प्रचारप्रसारको काम र घरदैलो कार्यक्रम तिव्र रुपमा अगाडि बढेको छ।
त्यस्तै पूर्वी चितवनको नेकपा एमाले राप्ती ६ नम्बर वडाले पनि घरदैलो अभियान सन्चालन गरेको छ। नारायणगढको नारायणी नदि किनारमा हुने नेकपा एमालेको १०औं राष्ट्रिय महाधिवेशनमा सहभागी हुन घर घरमा गएर निमन्त्रणा गरिएको राष्ट्रिय युवा संघ राप्ती नगर कमिटिका अध्यक्ष उत्तम सेढाईले जानकारी दिए। यसै गरी राप्तीको बाकी वडाहरुमा पनि महाधिवेशनमा सहभागी हुनको लागि भोलीबाट घरदैलो अभियान सन्चालन गर्न लागिएको उनले बताए। पार्टीको वडा कमिटीहरूको भेला र बैठक गरेर घरदैलो कार्यक्रम गर्न लागिएको हो।
घरदैलो कार्यक्रममा नेकपा एमाले राप्ती नगर कमिटिका अध्यक्ष पूर्ण बहादुर थापा, राप्ती वडा नम्बर ६ का वडा अध्यक्ष जलु चौधरी, एमाले जिल्ला सदस्य एवम् महिला नेतृ पुष्पा कुवर, नेकपा एमाले राप्ती ६ का उप सचिव सुजन थापा लगायत राप्ती वडा नम्बर ६ का विभिन्न टोलका नेताहरुको उपस्थिति रहेको थियो।
