असोज ०८, चितवन । नेकपा एमालेका स्थायी कमिटी सदस्य एवम् पूर्व गृहमन्त्री रामबहादुर थापा बादलले चितवनमा आफू प्रचण्डसँग चुनाव लड्न तयार भएको प्रतिक्रिया दिएका छन् । उनले एमाले पार्टीभित्र १० बुँदे कार्यान्वयन हुने अवस्था भए पनि आफू साविककै जिम्मेवारीमा रहने विश्वास व्यक्त गरे । प्रेस चौतारी नेपाल चितवनले भरतपुर विमानस्थलमा आयोजना गरेको पत्रकार सम्मेलनमा बोल्दै नेता बादलले चितवनमा प्रचण्ड भर्सेस बादलको चुनाव हुने भए पनि आफू चुनाबमा लड्न तयार रहेको बताए । उनले माओवादी केन्द्रका अध्यक्ष प्रचण्डलाई समाजवाद र राष्ट्रियताविरोधी भएको आरोप लगाएका छन् । उनले राष्ट्रियतामा नयाँ चूनौतीहरु देखा परेको बताए । बादलले वर्तमान सरकार कालोधन संरक्षणमा लागेको बताउनुभयो । उहाँले सरकारले कालोधन, दलाल र पूँजीवादलाई सृदृढ गर्न खोजेको बताउनुभयो । उहाँले राष्ट्रिय अर्थतन्त्र र पूँजीको संरक्षण गर्ने भन्दा पनि कालो धनलाई संरक्षण गर्ने काम वर्तमान सरकारले गरेको बताउँदै भन्नुभयो “यो लाईन भनेको पूँजीवादी लाईन हो, यसको नेतृत्व प्रचण्डले गरिरहनु भएको छ ।” प्रचण्ड दक्षणपन्थी गैरराजनीतिक दिशातर्फ लागेको आरोप लगाउँदै थापाले भन्नुभयो “लोकतन्त्र, राष्ट्रियता, समृद्धि र समाजवाद विरुद्ध वर्तमान सरकार लागेको छ ।” पुष्पकमल दाहालले पार्टीको लाईन छोडेर गुटको नेतृत्व गरिरहेको बताउँदै उहाँले भन्नुभयो “पार्टीको लाइन भनेको राष्ट्रियता हो, समाजवाद हो, समृद्धि हो, लाईन मैले होइन, दाहालले छोड्नु भएको छ ।” राष्ट्रियताका सवालमा नयाँ चुनौती खडा भईरहेको भन्दै उहाँले गृह मन्त्रालयले बोल्न नदिने, अर्थ मन्त्रालयले कालो धन संरक्षण गर्ने काम गरिरहेको बताउनुभयो । उहाँले अगाडि भन्नुभयो “लिम्पियाधुरा र एमसिसिका विरुद्ध बोल्न नपाउनु लोकतन्त्र र राष्ट्रियता विरोधी लाईन हो ।” प्रचण्ड एक्लिदै गएको बताउँदै उहाँले भन्नुभयो “उहाँको अभिव्यक्तिले नै यो कुरा पुष्टि गरिसकेको छ ।” सभामुख अग्निप्रसाद सापकोटाले लोकतन्त्र र विधिको शासन उल्लघन गरिरहेको भन्दै उहाँले भन्नुभयो “सभामुखले निष्पक्ष निर्णय गर्न सक्नु भएको छैन । एउटा पार्टीको कार्यकर्ताको भूमिका निर्वाह गरिराख्नु भएको छ ।” अमेरिकी मिलेनियम च्यालेन्स कर्पाेरेशन (एमसिसि) परिमार्जन गरेर पारित गर्नुपर्ने उहाँको धारणा थियो ।
