मङ्सिर ०२, काठमाडौं । इजलासमा फर्किएका सर्वोच्च अदालतका पाँच जना न्यायाधीशहरुले नेपाल बारको आन्दोलनप्रति फरक धारणा नरहेको बताएका छन्।
नेपाल बार एशोसिएशन र सार्वोच्च बार एशोसिएशनका पदाधिकारीहरुले बुधवार पाँच न्यायाधीशसँग गरेको छलफलमा न्यायाधीशहरुले बारको आन्दोलनमा आफूहरुको पूर्णसमर्थन रहेको जनाएको सर्वोच्च बार एशोसिएशनका सचिव ऋषिराम घिमिरेले बताए।
उनका अनुुसार छलफलमा न्यायाधीशहरुले न्याय सेवा प्रदान गर्ने विषयमा अनिर्णय र अनिश्चित भएका कारण आफूहरु इजलासमा फर्किएको बताएका छन्।
इजलासमा फर्किए पनि बारको आन्दोलनलाई आफूहरुको साथ सहयोग रहेको र त्यसमा आफूहरुको फरक धारणा नरहेको न्यायाधीशहरुले बताएको उनले जानकारी दिए।
प्रधान्यायाधीश चोलेन्द्र शमशेर राणाको राजीनामा माग गर्दै बारले आन्दोलन गरिरहेको छ। सर्वोच्चका बहुमत न्यायाधीशहरुले पनि राणाले तोकेको इजलास बहिस्कार गर्दै आएका छन्। तर, न्यायाधीशहरु बमकुमार श्रेष्ठ, मनोजकुमार शर्मा, तेजबहादुर केसी, कुमार रेग्मी र कुमार चुडाल इजलासमा फर्किएका छन्। बुधबार बारले यी न्यायाधीशहरुसँग छलफल गरेको हो।
