कात्तिक २३ , काठमाडौं । एक समय टेलिभिजनका चर्चित कलाकारहरु दीपकराज गिरी, दीपाश्री निरौला, केदार घिमिरे, सिताराम कट्टेल, जीतु नेपाल, निर्मल शर्मा लगायतले फिल्म ‘६ एकान ६’ बाट सहकार्यको यात्रा सुरु गरेका थिए । तर, फिल्म ‘वडा नम्बर ६’ पछि सिताराम र ‘छक्का पञ्जा’ पछि निर्मल शर्माले कलाकार र निर्माताको रुपमा यो समुह छाडे । अब जितु पनि दीपक दीपाको समुहबाट अलगिएका छन् । पछिल्लो रिलिज फिल्म ‘छ माया छपक्कै’ सम्म उनले दीपक र दीपाको टिममा रहेर काम गरेका थिए । उनी यो समुहका एक बलिया खम्बा हुन् ।
तर, गत वर्ष ‘महानायक’ विवादका कारण जितुले सञ्चालन गर्ने चर्चित कार्यक्रम ‘मुन्द्रेको कमेडी क्लब’ बाट दीपाश्रीलाई निकालिएपछि टिमभित्र मनमुटाव सुरु भयो । त्यसपछि जितु विनै फिल्म बनाउने निर्णयमा दीपक र दीपाको समुह पुग्यो । गत वर्ष यो समुहले एक फागू गीत सार्वजनिक गरेको थियो । जसमा जितुबाहेक ‘छक्का पञ्जा’ का प्रायः सबै कलाकारको अभिनय थियो । अब ‘छक्का पञ्जा ४’ को ट्रेलरमा पनि उनी अटाएका छैनन् । दीपक दीपाको समुहबाट जितु अलग भएको कुरामा लालमोहर लगाउन योभन्दा बलियो प्रमाण अरु के चाहिएला र ? ‘सूर्यवंशी’ हेर्न हल पुगेका दर्शकले ‘छक्का पञ्जा ४’ ट्रेलर हेर्न पाउनेछन् ।
यो फिल्म निर्माण भइसकेको छैन । अहिले दीपकराज फिल्मको स्क्रिप्टमै काम गरिरहेका छन् । तर, दर्शकलाई फिल्म चाँडै आउन लागेको जानकारी दिन निर्र्माण टिमले छायांकन नै गरेर ट्रेलर तयार पारेको हो । कमेडीले भरिएको ट्रेलरमा दीपक र दीपासँगै केदार घिमिरे, बुद्धि तामाङ, निर्मल शर्मा लगायत फिचर छन् । हलमा ट्रेलर हेरेका दर्शकले फिल्मको प्रतिक्षा गर्ने पक्का छ । आफूले अभिनय गर्दै आएको फिल्म ‘छक्का पञ्जा’ को चौथो सिरिजकोे ट्रेलरमा नअटेका जीतुले ट्रेलरमा नअट्दैमा फिल्ममा पनि नअट्ने भन्ने नहुने बताएका छन् । उनी भन्छन्, ‘हलमा बजिरहेको ‘छक्का पञ्जा ४’ कोे ट्रेलरमा म छैन । यसको अर्थ फिल्ममै म नहुने भन्ने हुँँदैन होला । दीपकजीले कस्तो कथा बनाउनुभएको छ त्यो मलाई थाहा छैन ।
सायद यो कथामा म नहुन पनि सक्छु ।’ दीपकराज गिरी र दीपाश्रीबाट आफूले आफ्नो योगदानभन्दा पनि धेरै पाएको उनी बताउँछन्् । ‘मलाई हिरो बनाइदिनुभयो । यति ठूलोे नाम दिनुभयो । म उहाँहरुप्रति एकदमै आभारी छु । एउटा फिल्ममा म नहुँदा कुनै चित्त दुखाई छैन । म हमेशा उहाँहरुलाई सहयोग गर्नेछु । मलाई बोलाउनु भयो भने पनि काम गर्न तयार छु । नभए पनि सदा उहाँहरुकै साथमा रहनेछुु,’ जीतुले भने ।
