चितवन- नेपाल लोकतान्त्रिक यातायात व्यवसायी संगठनको तेस्रो राष्ट्रिय अधिवेशन गैँडाकोटमा हुने भएको छ । एमाले निकट व्यवसायी संगठनको तेस्रो अधिवेशन यही पुस २४ र २५ गते गैँडाकोटमा हुने भएको हो ।
संगठनले आज (मंगलबार) भरतपुरमा पत्रकार सम्मेलन गरी दुई दिनसम्म सञ्चालन हुने अधिवेशनको सम्पूर्ण तयारी समेत पुरा भएको जानकारी गराइएको हो ।
अधिवेशनमा देशभरबाट ४ सय प्रतिनिधि सहभागी हुने अध्यक्ष श्रीप्रसाद मैनालीले जानकारी दिए । अधिवेशनको बन्द सत्रमा यातायात व्यवसायीका साझा समस्याबारे छलफल हुने अध्यक्ष मैनालीले बताए ।
संगठनले देशभरी संचालित यात्रुवाहक मालवाहकलाई व्यवस्थित मर्यादित सेवामुलक व्यवसायमा संस्थागत रुपमा अगाडि बढाउने कार्य गर्दै आएको बताउँदै यातायात मजदुर सम्बन्धित सरोकारवालासंग राष्ट्रिय तथा अन्तरराष्ट्रिय रुपका संस्थाहरुसंग हातेमालो गरेर अगाडि बढ्ने उनले बताए ।
गैँडाकोटको श्रीराम पार्टी प्यालेसमा हुने अधिवेशनको उद्घाटन एमालेका उपमहासचिव प्रदिप ज्ञवालीले गर्ने छन् ।
अधिवेशनले तीन वर्षका लागि १७ पदाधिकारी सहितको ७३ सदस्यीय नयाँ कार्यसमिति चयन गर्नेछ । नेपाल लोकतान्त्रिक यातायात व्यवसायी संगठनमा १० हजार व्यवसायी आवद्ध रहेका छन् ।
