चितवन- नेपालकै प्रमुख धार्मिक स्थल देवघाटमा विशेष देवघाट महा महोत्सव यही पौष २७ देखि माघ ३० सम्म आयोजना हुने भएको छ। १ लाख शीला पूजन र देवघाट दिव्यधामको शिलान्यास महोत्सवका मुख्य आकर्षण हुन्। आयोजकका अनुसार महोत्सवमा करिब ३० लाख भक्तजनको सहभागिता हुने अपेक्षा गरिएको छ।
महोत्सवको पहिलो दिन देवघाट दिव्यधाम परियोजनाको शिलान्यास कार्यक्रम आयोजना हुनेछ। यो ऐतिहासिक कार्यलाई विभिन्न साधु-सन्तहरूको आशीर्वाद र मार्गदर्शनमा सम्पन्न गरिनेछ।
महोत्सवभरि १ लाख शीला पूजन कार्यक्रम सञ्चालन हुनेछ, जसका लागि गण्डकी नदीबाट विशेष धार्मिक महत्व बोकेका शीलाहरूको सङ्कलन गरिएको छ।
महोत्सवमा देश-विदेशका ख्यातिप्राप्त देवी प्रतिभा, यशोदा माताजी, अनुराधा पाण्डेय, ओम प्रकाश सुवेदी, लगाएत कथा वाचकहरूको दैनिक प्रवचन हुनेछ।
विशाल पण्डालमा एकैपटक २० हजार भक्तजनले कथा श्रवण गर्न सक्ने व्यवस्था गरिएको छ।
भजन-कीर्तन र सांस्कृतिक कार्यक्रमहरूले महोत्सवलाई झन् आकर्षक बनाउनेछन्।
श्रद्धालुहरूले त्रिशूली र गण्डकी नदीको संगमस्थलमा विशेष माघ स्नान गरी पुण्य लाभ लिने अवसर पाउनेछन्।
भक्तजनहरूको सुविधाका लागि निशुल्क खाना, बसोबास, र शौचालयजस्ता व्यवस्थाहरू तयार गरिएका छन्। सुरक्षा र अन्य प्रशासनिक व्यवस्थामा पनि उच्च सतर्कता अपनाइएको छ।
महोत्सवलाई विशेष बनाउन देशभरका हिन्दू धर्मावलम्बीहरूले राम नाम लेखन र बत्ति काट्ने अभियान सञ्चालन गरिरहेका छन्। यसले धार्मिक चेतना बढाउन महत्त्वपूर्ण भूमिका खेलिरहेको आयोजकहरूको भनाइ छ।
महोत्सवको अर्को मुख्य पक्ष माता-पिता सेवा आश्रमको निर्माण हो। ३६५ कोठाहरू रहेको यो आश्रमले वृद्ध मातापितालाई सुविधा सम्पन्न र धार्मिक वातावरण प्रदान गर्ने लक्ष्य राखेको छ।
आयोजक समितिले देवघाट महा महोत्सवले नेपाललाई विश्वस्तरीय धार्मिक पर्यटनको केन्द्रका रूपमा चिनाउने विश्वास लिएको छ।
“देवघाट महोत्सवले धार्मिक, सांस्कृतिक, र सामाजिक एकताको सन्देश प्रवर्द्धन गर्दै राष्ट्रिय गौरवको आयोजनाका रूपमा स्थापित हुने छ,” आयोजक समितिका प्रवक्ताले बताए।
महोत्सवमा एक एक शीला समर्पण कर्ता बन्ने गरि सहभागी हुन आयोजकहरूले सम्पूर्ण हिन्दू धर्मावलम्बीहरूलाई विशेष आह्वान गरेका छन्।
