मसिंर २२ गते, भरतपुर ।
गंगानगर दुग्ध उत्पादक सहकारी संस्था लिमिटेडको ३१ औं साधारण सभा भरतपुरको पर्यटकीय नगरी पटिहानीमा आज (शनिबार) सम्पन्न भएको छ । संस्थाका अध्यक्ष कृष्ण प्रसाद सापकोटाको अध्यक्षता र भरतपुर महानगरपालिका वडा नं.२२ का वडाअध्यक्ष विष्णुराज महतोको प्रमुख आतिथ्यतामा सभा सम्पन्न भएको हो । कार्यक्रममा बोल्दै प्रमुख अतिथि महतोले समग्र भरतपुरलाई दुधको हब बनाउने कार्यमा गंगानगर दुग्ध सहकारीको विषेश योगदान रहने भन्दै प्रशंसा गर्नुभयो । भरतपुरलाई दुधमा आत्मनिर्भर बनाउन महानगरपालिकाले विषेश जोड दिदै युवाहरुलाई दुग्ध ब्यवसायमा सहभागि बनाउन विषेश अनुदान दिदै आएको उहाँको भनाई थियो । वडा नं. २२ लाई कृषि पर्यटनको पनि गन्तब्य बनाउन गंगानगर सहकारी जस्ता संस्थाको परामर्शमा आफुले बजेट ब्यवस्थापन गर्दै आएको वडाअध्यक्ष महतोको भनाई रहेको थियो । दुधका लागि पशुपालन गर्ने कृषकको संख्यामा वृध्दि गर्न आकर्षक कार्यक्रमहरु ल्याउने प्रतिबध्दता समेत उहाले जनाउनुभयो ।
साधारण सभाको अवसरमा जग्गादाता गायत्री सापकोटा, एसईईमा उत्कृष्ट अकं ल्याउने प्रविना खत्री र सक्षम दवाडी, सरसफाई तर्फ बसुन्धरा पौडेल, रमा पौडेल, विष्णुमाया काफ्ले, गुणस्तर तर्फ रमा वि.क., गंगामाया आले मगर, विक्रम थापा, क्षेत्रगत तर्फ लोकबहादुर वि.क., शोभा खत्री विश्वकर्मा, रिता वि.क.लाई सम्मान गरिएको थियो । त्यस्तै १६ जनालाई वृध्द र १६ जना घासँखेति कृषकलाई पनि सम्मान गरिएको थियो ।
२०४९ सालमा स्थापना भएको गंगानगर दुग्ध उत्पादक सहकारीले आर्थिक र सामाजिक गतिविधिका कार्यक्रमहरु नियमित रुपमा गर्दै आईरहेको संस्थाका अध्यक्ष कृष्णप्रसाद सापकोटाले बताउनुभयो । उहाले विमा कार्यक्रममा सहभागि शेयर सदस्यहरुलाई प्रति २० पैसा अनुदान दिने साथै, शेयर सदस्यका कोहिपनि सन्तान पशु प्राविधिक शिक्षा पढेमा २५ प्रतिशत छात्रवृध्दि उपलब्ध गराउने समेत जानकारी गराउनुभयो । सरकारले दुध किसानले पाउनुपर्ने भुक्तानी समयमै उपलब्ध नगराएका कारण किसानले दुध सडकमा पोख्नुपर्ने बाध्यता आईपरेकोले यसतर्फ गम्भिर बन्न अध्यक्ष सापकोटाले अनुरोध गर्नुभयो ।
संस्थाले किसानहरुबाट संकलित दुध प्रशोधन गरी आफ्नै ब्रान्डमा दुध अनि दुधका परिकारहरु तयार गरि बजारमा विक्रि वितरण गर्दै आईरहेको छ । ‘गंगा’ ब्रान्डको दूध र दूधजन्य परिकारहरूको उत्पादन बजारमा ल्याएको यस सहकारीको आफ्नै विक्रि केन्द्र समेत रहेको छ । दुधको उत्पादनमा वृध्दि गर्ने उद्देश्यका साथ सहकारी आफैले पनि पशुपालन गर्दै आईरहेको छ । सहकारीले किसान र स्रोत केन्द्रबाट गरी सहकारीमा दैनिक ८ हजारभन्दा बढी लिटर दूध उत्पादन र संकलन गर्दै आईरहेको छ । सहकारीले चितवन, नवलपरासी, रुपन्देही, मकवानपुर, तनहुँ, कास्की, गोर्खा, धादिङ र काठमाडौंका मुख्यबजार क्षेत्रमा गंगा ब्रान्डको उत्पादित वस्तु तथा सेवा खुद्रा तथा थोक बिक्रीगर्दै आएको छ । आफ्नै उद्योग बाट सहकारीले दूधबाट दही, मोही, घिउ, पनिर, नौनी, खुवा, बटर, छुर्पी, क्रिम लगायतका विभिन्न मिठाईका उत्पादन गर्दै आएको सहकारीका व्यवस्थापक गणेश साखीले बताउनु भयो । गंगानगर दुग्ध उत्पादक सहकारी संस्थाको पटिहानी धनौजीको मुख्य कार्यालय सगैँ दुई वटा अन्य सेवा केन्द्रबाट समेत सेवा दिदैँ आएको उहाँले बताउनुभयो ।
