नवलपुरको गैँडाकोटस्थित नारायणी नदी किनारमा आगामी कात्तिक २३ गतेदेखि गण्डकी प्रदेशस्तरीय महोत्सव हुने भएको छ । नेपाल उद्योग वाणिज्य महासंघ गण्डकी प्रदेशको आयोजनामा दोस्रो गण्डकी प्रदेशस्तरीय औद्योगिक व्यापार तथा कृषि महोत्सव २०८१ हुन लागेको हो ।
महोत्सवबारे जानकारी दिन गैँडाकोटमा आज आयोजित पत्रकार सम्मेलनमा नेपाल उद्योग वाणिज्य महासंघ गण्डकी प्रदेशका अध्यक्ष एवम् महोत्सवका मूल संयोजक अमृत भट्टचनले मंसिर १० गतेसम्म महोत्सव सञ्चालन हुने जानकारी दिनुभयो । महोत्सवले गण्डकी प्रदेशकै आर्थिक गतिविधि चलायमान बनाउन एवम् नयाँ सम्भावनाको खोजी गर्ने विश्वास लिएको मेलाका भट्टचनले बताउनुभयो । मेला मार्फत नवलपुरका सबै पर्यटकीय क्षेत्रको प्रवद्र्धन तथा सम्भावनाको खोजी गर्दै त्रिवेणीधामदेखि पोखरा हुँदै मुक्तिनाथसम्मको पर्यटकीय करिडरको प्रचार गर्ने उद्देश्य रहेको भट्टचनको भनाइ छ ।
महोत्सवमा औद्योगिक तथा व्यापार मेला हस्तकला मेला, कृषि मेला, पुष्पमेला, अटोमेला, सूचना तथा प्रविधिहरुको प्रर्दशनी, विभिन्न सरकारी तथा गैरसरकारी संघसंस्थाहरुको गतिविधिहरुको प्रदर्शनीलगायत दैनिक उपभोग्य वस्तु घरायसी सरसामान, लत्ताकपडा, शृंगारका सामानहरुको बिक्री वितरण रहेका छन् ।
महोत्सवले गण्डकी प्रदेशको औद्योगिक, कृषिजन्य, हस्तकलाका उत्पादन, सूचना प्रविधि शिक्षा, स्वास्थ्य पर्यटनलगायत कृषिजन्य उत्पादनहरुलाई प्रबद्र्धन तथा बजारीकरणमा समेत सघाउ पु¥याउने उद्देश्य राखेको छ । मेलाको थप आकर्षणतर्फ ख्यातिप्राप्त राष्ट्रिय कलाकारहरुबाट सांस्कृतिक कार्यक्रम र बालउद्यान पनि समावेश गरिएको भट्टचनको भनाइ छ ।
महोत्सवमा ३०० वटा स्टल रहेका छन् । एक करोड रुपैयाँ बराबरको कारोबार हुने अपेक्षा गरिएको महोत्सव प्रवेशका लागि सर्वसाधारलाई रु १०० तथा विद्यार्थीलाई रु ५० को टिकटको व्यवस्था गरिएको छ । त्यस्तै ७० वर्षभन्दा माथिका ज्येष्ठ नागरिकलाई निःशुल्क महोत्सव प्रवेशको व्यवस्था गरिएको भट्टचले बताउनुभयो । रु १०० को टिकट काटेर महोत्सव प्रवेश गर्ने व्यक्तिलाई सो टिकटको आधारमा मौलाकाली केबलकारको टिकटमा ५० प्रतिशत छुट दिन सहमति भएको समेत पत्रकार सम्मेलनमा जानकारी दिइएको छ ।
