भरतपुर – चितवन अटोमोवाईल डिलर्स एसोशियशन (काडा) को आयोजनामा चितवन प्रदर्शनी केन्द्रको सभाहलमा काडा अटो एक्स्पो २०८१ को शुभारम्भ गरिएको छ ।चितवन अटोमोवाईल डिलर्स एशोसिएसन (काडा) का अध्यक्ष राजन पियाको अध्यक्षतामा सम्पन्न कार्यक्रममा भरतपुर महानगरपालिकाकी नगरप्रमुख रेनु दाहालले एक कार्यक्रमका बीच मेलोको उद्घाटन गर्नुभएको थियो ।
प्रमुख अतिथि दाहालले गाडी तथा मोटरसाइकलका विभिन्न उत्पादनहरुलाई एकै थलोबाट खरिद बिक्री गर्ने उद्देश्यका साथ आयोजना गरिएको काडा अटो एक्स्पोले चितवनको आर्थिक क्षेत्रमा महत्वपूर्ण भूमिका खेल्ने बताउनुभयो । प्रमुख अतिथि दाहालले भरतपुर भ्रमण वर्ष २०२४ लक्षित गरी आयोजना गरिएको काडा अटो एक्स्पोको सफलताको शुभकामना व्यक्त गर्नुभयो ।
चितवन अटोमोवाईल डिलर्स एशोसिएसन (काडा) का अध्यक्ष राजन पियाले स्वागत मन्तव्यसँगै मेलाको बारेमा प्रकाश पार्नुभएको कार्यक्रममा विशिष्ट अतिथि चितवनका प्रमुख जिल्ला अधिकारी इन्द्रदेव यादवले सम्पूर्ण ब्राण्डका गाडीहरु एकै स्थानबाट ग्राहकहरुले सजिलै खरिद बिक्री गर्ने योजना अनुरुप चितवनमा नै पहिलो पटक शुरु भएको काडा अटो एक्स्पो आगामि दिनहरुमा समेत निरन्तरता दिई सञ्चालन गर्नुपर्ने बताउनुभयो ।
त्यस्तै चितवन उद्योग संघका कार्यवाहक अध्यक्ष मदन घिमिरेले चितवन प्रदर्शनी केन्द्रको वातानुकुलित हलमा जस्तोसुकै घामपानी, हावाहुरीको समयमा समेत निर्धक्कका साथ प्रदर्शनी सञ्चालन हुने भएकोले अटो एक्स्पोमा आउने ग्राहकहरुले आफ्नो समयअनुकुल एक्स्पोको लाभ लिन सक्ने बताउनुभयो । घिमिरेले संघको परिसरमा १९ गतेसम्म सञ्चालन हुने एक्स्पोको सफलताको कामना गर्दै एक्स्पो अवलोकनका लागि सम्पुर्णमा आव्हान समेत गर्नुभयो ।
त्यस्तै उद्योग वाणिज्य संघ चितवनका प्रथम उपाध्यक्ष राजेन्द्र ओलीले चितवनमा शुरु भएको काडा अटो एक्स्पोले देशकै आर्थिक अर्थतन्त्रमा प्रभाव पार्ने बताउनुभयो । चितवनको बजारमा काडा अटो एक्स्पोको आवश्यकता र सोही आवश्यकताको परिपूर्ति गर्नको लागि एक्स्पो निकै फलदायी हुने बताउनुभयो ।
त्यस्तै चितवन च्याम्बर अफ कमर्शका अध्यक्ष गोपाल भट्टराईले चितवनमा पहिलो पटक आयोजना गरिएको एक्स्पो प्रति मानिसहरुको आकर्षण बढेको र ग्राहकहरुबाट यस्ता प्रकारका एक्स्पोहरु समय–समयमा हुनुपर्ने सल्लाह सुझावहरु आईरहेको बताउनुभयो । भट्टराईले अटोमोवाईल व्यवसायीहरुको पेशागत मर्यादालाई उच्च प्राथमिकतामा राखि व्यवसायिक हक हितका एकै ठाउँमा रही आउने चुनौतीको सामाना गर्नको लागि पनि मेलाको ठूलो भूमिका रहेको बताउनुभयो ।
मेलामा साना ठुला गरी एक्काइस वटा कार, जिप, मोटरसाइकल र स्कुटरको लगायतका सवारी साधानहरुको स्टल रहनेछन् । भने जिप र माइक्रोको करिव पाँच वटा स्टल र प्रदशनी हल वाहिरको चौरमा टेन्ट भित्र समेत स्टलहरु रहेका छन् । मेला अवधिमा आउने ग्राहकहरुलाई स्पोर्टमै फाईनान्स तथा इन्स्योरेन्स सेवा उपलव्ध गराईनेछ ।
मेलामा करिव चालिस हजार जनाले अवलोकन गर्ने अनुमान गरिएको मेला अवधिमा गाडी किन्ने ग्राहकहरुलाई कम्पनीहरुबाट आर्कषक स्कीम तथा छुटको व्यवस्था समेत गरिएको छ । मेला अवधिभर गाडी बुकिङ गर्ने गाहकहरु मध्येवाट लक्कि ड्र मार्फत तिन जनालाई अर्कषक उपहारको व्यवस्था गरिने छ । मेलामा सवारी साधानका साथै बैंक तथा इन्स्योरेन्सका समेत स्टल रहेका छन् ।
चितवन अटोमोवाईल डिलर्स एशोसिएसन (काडा) का सदस्य होमनाथ पौडेलले सञ्चालन गर्नुभएको कार्यक्रमलाई चितवन अटोमोवाईल डिलर्स एशोसिएसन (काडा) का संस्थापक अध्यक्ष ईश्वर कुमार श्रेष्ठले धन्यवाद मन्तव्य सहित कार्यक्रम समापन गर्नुभएको थियो ।
