असोज ६, चितवन।
भरतपुर ११ चितवनमा रहेको युनाइटेड टेक्निकल कलेजमा आज “दिगो निर्माण प्रविधि र व्यवस्थापन: चुनौती र अवसर “विषयक अन्तराष्ट्रिय सम्मेलन सम्पन्न भएको छ। सम्मेलनको उद्घाटन पोखरा विश्वविद्यालय, विज्ञान तथा प्रविधि संकायका डिन प्राध्यापक राजेश कुमार ठकुरीले गरेका थिए।
ठकुरीले दिगो निर्माण र व्यवस्थापनको महत्व र यसका अवसरहरूको चर्चा गर्दै युवा विद्यार्थीहरुलाई यस क्षेत्रमा संलग्न हुन प्रोत्साहित गरेका छन्। सम्मेलनमा बोल्दै कलेजका प्रबन्ध निर्देशक ई.बाबुराम उपाध्यायले दिगो निर्माण प्रविधिको प्रयोगले समाजमा पार्न सक्ने सकारात्मक प्रवाहको बारेमा चर्चा गरेका थिए। स्वागत मन्तव्य राख्दै कलेजका अनुसन्धान निर्देशक डा. अर्जुन बानियाँले सम्मेलनको मुख्य उद्येश्य दिगो निर्माण प्रविधि र व्यवस्थापनमा रहेका चुनौती र अवसरहरूको चर्चा गर्नु नै रहेको जानकारी दिए। यसैगरि सम्मेलनमा बोल्दै कलेजका प्राचार्य प्राध्यापक डा. केशव दत्त अवस्थीले सहभागीको नयाँ सोचबाट आफू निकै प्रभावित भएको र यसले आधुनिक प्रविधि उपयोग र नवप्रवर्दनमा महत्वपूर्ण योगदान दिने बताए। सम्मेलनमा कृषि संकायका डिन प्राध्यापक डा. अर्जुन कुमार श्रेष्ठले दिगो निर्माण प्रविधि र व्यवस्थापनको बारेमा चर्चा गरेका थिए।
उक्त कार्यक्रमको सञ्चालन सिभिल विभागिय प्रमुख निरज बोहोराले गरेका थिए। सम्मेलनमा नेपाल, अमेरिका, बेलायतका विभिन्न विश्वविद्यालयबाट उपस्थित प्राध्यापक, अनुसन्धानकर्ताहरूले मुख्य वक्ताको रुपमा आफ्नो अनुसन्धान प्रस्तुत गरेका थिए। सम्मेलनमा ज्याक्सन विश्वविद्यालय अमेरिकामा कार्यरत प्राध्यापक डा.रकी ताल्चाभडेल , डा. ओम प्रकाश गिरी, पोखरा विश्वविद्यालय डा. रामहरि पौडयाल लगायतले आफ्नो अनुसन्धान प्रस्तुत गरेका थिए।
सम्मेलनका प्रमुख विषयवस्तुहरूमा जलवायु परिवर्तनका बीचमा दिगो विकास, वातावरणिय प्रभाव मूल्याङ्कन, कङ्क्रिटका विभिन्न गुणहरूको अन्वेषण, खानेपानी योजनाहरुको दिगोपन मूल्याङ्कन लगायतका विषयहरु समावेश रहेका थिए। सम्मेलनका दौरान विभिन्न प्राविधिक सत्रहरु भएका थिए। उक्त सत्रमा युटेक , पोखरा विश्ववद्यालय इन्जिनियर संकाय लगायतका देशका अन्य विश्वबिद्यालयका विद्यार्थीहरुले आफ्नो अनुसन्धान प्रस्तुत गरेका थिए।
यसअघि पनि सन् २०२१ मा कलेजले दियो इन्जिनियरिङ्ग प्रविधि र व्यस्थापन विषयक अन्तराष्ट्रिय सम्मेलन आयोजना गरिसकेको थियो।
