१३ असार , चितवन।
भरतपुरमा रहेको चितवन माध्यमिक विद्यालयले यस वर्षको एसईई परीक्षामा उत्कृष्ट नतिजा ल्याउन सफल भएको छ।
चितवनको सामुदायिक विद्यालयहरू मध्य उत्कृष्ट शैक्षिक गन्तव्यको रुपमा स्थापित हुँदै आएको चितवन माध्यमिक विद्यालयका विशाल मग्रातिले ४ जिपिए ल्याएका छन्। बिहीबार प्रकाशित एसईईको परीक्षाफलमा माग्रातिले ४ जिपिए ल्याएका हुन्।
चितवन माध्यामिक विद्यालयबाट ६२ जना विद्यार्थीले एसईई दिएकोमा ९ जना विद्यार्थीले ३.६ जीपिए भन्दा माथि ३.९९ सम्म अंक ल्याउन सफल भएका छन्। यस्तै २५ जना विद्यार्थीले ३.२ जिपिए देखि ३.६ सम्म , २४ जना विद्यार्थीले २.८ जीपिए देखि ३.२ सम्म र ३ जना विद्यार्थीले २.४ जीपिए देखि २.८ जीपिए सम्म ल्याउन सफल भएका छन्।
चितवन मावि वि.सं. २०११ मा स्थापना भएको जिल्लाको सबैभन्दा पुरानो विद्यालय हो । ‘विशाल मगराती पश्चिम चितवन शुक्रनगरबाट यहाँ कक्षा ८ मा पढ्न भर्ना भएका थिए । उनको पढाई राम्रो थियो । त्यही अनुसारको नतिजा पनि आयो’ विद्यालयका प्रधानअध्यापक चिरञ्जीवी शर्माले भने । विद्यालय व्यवस्थापन समितिका अध्यक्ष प्रकाश अधिकारीका अनुसार पहिला पहिला स्कुलले राम्रै नतिजा ल्याउने गर्थ्यो । ‘तर ०४८ यता आएको यो नै सबैभन्दा सफल नतिजा हो,’ अध्यक्ष अधिकारीको दाबी छ ।
