७ असार , शुक्रबार
कालिका नगरपालिकास्तरीय मेयर कप हाजिरीजवाफ प्रतियोगिताको उपाधि चित्रवन माविले जितेको छ । कालिका नगरपालिका–१, सूर्यपुरस्थित राष्ट्रिय माध्यामिक विद्यालय शमीपुरले विहीबार आयोजना गरेको उक्त प्रतियोगितामा ११ वटा विद्यालयलाई पछि पार्दै चित्रवन मावि प्रथम हुन सफल भएको हो । नेपाल स्काउटको ७३ औं स्थापना दिवसको अवसरमा आयोजना गरिएको प्रतियोगितामा कालिका–४ स्थित पदमपुर शिक्षा निकेतन दोस्रो, कालिका–५ स्थित भीमोदय नमुना मावि तेस्रो तथा कालिका–९ मा रहेको चतुर्मुखी माविले सान्त्वना स्थान हासिल गरे । प्रतियोगितामा इतिहास र भूगोल, जीके र आईक्यू, समसामयिक घटनाक्रम, विज्ञान तथा प्रविधि, धर्म, संस्कृति, कला र साहित्य, खेलकुद, गाउँखाने कथा र ¥यापिड फायर गरी ८ चरणमा प्रश्न सोधिएको कार्यक्रमका संयोजक दिपेश बस्नेतले जानकारी दिए । ‘प्रतियोगिता घोषणासँगै विद्यालय र विद्यार्थीहरुको चासो उच्च विन्दूमा थियो, जुन सौहार्द र प्रतिष्पर्धात्मक रुपमा प्रतियोगिता सम्पन्न भएको छ, यसबाट हामीलाई थप कार्यत्रम गर्ने उर्जा थपिएको छ,’ बस्नेतले भने ।
यसअघि कालिका नगर प्रमुख विनोद रेग्मी र उपप्रमुख विमला लामाले सहभागी विद्यार्थीहरुलाई १÷१ वटा प्रश्न सोधेर प्रतियोगिताको उद्घाटन गरेका थिए । उद्घाटन सत्रमा बोल्दै प्रमुख अतिथिसमेत रहेका नगर प्रमुख रेग्मीले यस्ता कार्यक्रमले बालबालिकाको क्षमता अभिवृद्धि गर्न टेवा पुग्ने धारणा राखे । ‘बालबालिकामा आज गरेको लगानीको प्रतिफल आजै पाइँदैन, यो त भविष्यका लागि हो,’ उनले भने, ‘त्यसकारण विद्यालय र विद्यार्थीको क्षमता बढाउने काममा हामी सबै लाग्नुको विकल्प छैन ।’आगामी आर्थिक वर्ष २०८१÷०८२ का लागि नगरपालिकाले ल्याएको नीति तथा कार्यक्रममा पनि विद्यार्थी र युवा शक्ति केन्द्रित योजनालाई स्थान दिइएको उनले जानकारी दिए । ‘कालिका नगरपालिकाले विद्यार्थी र युवालाई लक्षित गर्दै उपप्रमुखसँग विद्यार्थीजस्ता विभिन्न कार्यक्रम गर्दै आएको छ, आगामी आवमा पनि यी कार्यक्रमले निरन्तरता पाएका छन्, केही थपेका पनि छौं,’ उनले भने, ‘थप रचनात्मक र प्रभावकारी हुने खालका योजना लिएर आउनुभयो भने नगरपालिका तपाईंहरुलाई हरदम साथ दिन तयार छ ।’कालिका–१ का अध्यक्ष सन्तवीर स्याङ्दान र कालिका–४ का अध्यक्ष एवम् नगरपालिकाको सामाजिक विकास समिति संयोजक मकरमान श्रेष्ठले माध्यामिक तहसम्मका विद्यालयको व्यवस्थापन गर्ने अधिकार स्थानीय तहमा आइसकेपछि धेरै विद्यालयको स्तर सुध्रिएको जिकिर गरे । यसमा शिक्षक र अभिभावकको पनि महत्वपूर्ण साथ पाएको उनीहरुको भनाइ थियो ।
कार्यक्रमका सभाध्यक्ष एवम् विद्यालय व्यवस्थापन समिति अध्यक्ष सोमबहादुर खड्काले बितेका ३५ वर्षमा विद्यालयको स्वरुप नै कायापलट भएको दाबी गरे । ‘२०६८ सालमा व्यवस्थापन समितिको अध्यक्ष भएर आउँदा एउटा टहरो थियो, १६ जना विद्यार्थी थिए । दोस्रो वर्ष ३५ जना भए,’ अध्यक्ष खड्काले स्मरण गरे, ‘शिक्षक–कर्मचारीको लगातारको मिहिनेत र अभिभावक तथा पालिकाको पनि साथले प्राथमिक विद्यालय अहिले माध्यामिक तहसम्म पढाउने भएको छ । पर्याप्त भवन, खेलमैदान, बसलगायतको सेवासुविधा थप्न सफल भएका छौं ।’
विद्यालयका प्रधानाध्यापक धर्मेन्द्रजंग रायमाझीले नगरस्तरीय हाजिरीजवाफ प्रतियोगिता तेस्रोपटक आयोजना गरिएको जानकारी दिए । ‘यसअघि रनिङ सिल्ड प्रतियोगितानै आयोजना गरेका थियौं तर बीचमा कोरोना महामारीका कारण त्यसलाई निरन्तरता दिन सकेनौं,’ उनले थपे, ‘हामी विद्यार्थीको मानसिक र शैक्षिक विकासमा सदैव कटिबद्ध छौं ।’ आगामी दिनमा थप रचनात्मक कार्यक्रम गर्दै जाने र त्यसमा यस कार्यक्रममा जस्तैगरी नगरपालिका र अन्य सहयोगीहरुको साथको अपेक्षा पनि उनले गरे ।प्रतियोगितामा विजयी हुने चारवटै विद्यालयलाई प्रमाणपत्र, मेडल र कप प्रदान गरिएको थियो ।राष्ट्रिय माध्यामिक विद्यालय शमीपुरले आयोजना गरेको उक्त प्रतियोगिताको मिडिया पाटनर कालिका एफ एम ९५.२ र कालिका एचडी टि भी रहेको थियो।
