गैंडाकोट-५ मा अवस्थित सहकारी अवधारणामा सञ्चालित विजय सामुदायिक शिक्षा सदनले आफ्ना नवआगन्तुक विद्यार्थीहरू र आफूलाई विश्वास गरेर विद्यार्थी भर्ना गर्नुहुने अभिभावकज्यूहरूको स्वागत तथा सम्मानमा कार्यक्रम सम्पन्न गरेको छ। विद्यालय सञ्चालक समितिका उपाध्यक्ष श्री परमेश आचार्यको अध्यक्षतामा सञ्चालित उक्त कार्यक्रममा सञ्चालक समितिका निवर्तमान अध्यक्ष श्री टिकाराम कँडेल, सञ्चालक समिति सदस्यहरु हरिबहादुर कुँवर र रामचन्द्र चालिसे अतिथिको रुपमा उपस्थित हुनुहुन्थ्यो।
उक्त कार्यक्रममा विद्यार्थीहरूको प्रस्तुति र प्रतिभा हेर्न र सुन्न लायक थियो। आफ्ना नव आगन्तुक साथीहरूलाई स्वागत र सम्मान गर्न विद्यार्थीहरूनै सक्रिय रूपमा सहभागी भएका थिए। सम्राट अर्याल, बेनिसा सोराली मगर, जस्मी रेग्मीले स्वागत तथा शुभकामना मन्तव्य राखेको कार्यक्रममा आसिका पौडेल, प्रशंसा खनाल, करुणा भण्डारी र विभूति सापकोटा लगायतले आफ्ना गीत, कविता तथा गजल प्रस्तुत गरेका थिए। चक्रधर पौडेलको शब्द रचनामा कक्षा आठका विद्यार्थीहरू प्राञ्जल सापकोटा, ऋतिक कडेंल, सरिम सापकोटा र हिरा थापाले गाएको स्वागत गीतमा भोजराज थापाले संगीत दिनुभएको थियो।
कक्षा एलकेजी देखि कक्षा ९ सम्मका विद्यार्थीहरूको लागि आयोजित उक्त कार्यक्रममा कक्षा एलकेजीदेखि कक्षा ७ सम्मका ३५ जना विद्यार्थीहरूले आकर्षक गीत तथा नृत्यमा आफ्नो प्रस्तुति प्रस्तुत गरेका थिए। कार्यक्रममा विद्यालय सञ्चालक समितिका उपाध्यक्ष तथा कार्यक्रमका सभापति श्री परमेश आचार्यले सम्पूर्ण अभिभावकहरुलाई विद्यालयप्रति देखाउनुभएको सदासयता र भरोसाप्रति कृतज्ञता व्यक्त गर्दै उहाँहरूको आशा र भरोसालाई टुट्न नदिने प्रतिबद्धता व्यक्त गर्नुभयो। विद्यालयका प्रधानाध्यापक श्री रेखा श्रेष्ठले विद्यालयको बारेमा संक्षिप्त जानकारी राख्नुभएको उक्त कार्यक्रमलाई विद्यालयका सहायक प्रधानाध्यापक श्री चक्रधर पौडेलले सञ्चालन गर्नुभएको थियो।
