बैशाख २१, भक्तपुर । यही वैशाख ३० गते हुने पालिका चुनावमा ठूला राजनीतिक दलबाटै आचारसंहिता उल्लङ्घन भएको पाइएको छ । जिल्ला प्रशासन कार्यालय र जिल्ला निर्वाचन कार्यालयले आज बुधवार भक्तपुरमा आयोजना गरेको चुनावबारे सञ्चारकर्मीसँगको अन्तरक्रियामा यस्तो बताइएको हो ।
कार्यक्रममा प्रमुख जिल्ला अधिकारी रुद्रादेवी शर्माले चुनावलाई प्रभावित पार्ने गरी मतदातालाई कम्बल र थर्मस बाँडिरहेको जानकारी पाएपछि प्रहरी पठाएर त्यसलाई रोकिएको बताउँदै उहाँले केही दलले आचारसंहिता विपरीत काम गर्न खोजेकाले यस्ता कार्यक्रमलाई रोक लगाएको बताउनुभयो । उहाँले भन्नुभयो, ‘जिल्ला प्रशासन कार्यालयसँग अनुमति नलिइ भक्तपुरको सूर्यविनायक र चाँगुनारायणका केही वडामा मतदातालाई प्रभावित पार्ने गरी कम्बल र थर्मसलगायतका सामग्री बाँड्दै गर्दा हामी तत्कालै पुगेर रोक्यौँ, यहीँ बीचमा अनुमति लिन आएका झन्डै २० वटा कार्यक्रमलाई समेत चुनावमा प्रभावित पर्ने देखेर रोक लगाएका छाँ, सम्मान र पुरस्कार वितरणजस्ता कार्यक्रमलाई पनि रोक लगाएर चुनावपछि गर्न भनेका छौँ, निर्वाचन आचारसंहिता विपरीत दलको गतिविधिसमेतलाई रोक लगाउँदै आएका छौँ ।’
महानगरीय प्रहरी परिसर भक्तपुरका प्रहरी उपरीक्षक (एसपी) शिवकुमार श्रेष्ठले ठूला दलबाटै आचारसंहिता उल्लङ्घन भइरहेको जानकारी दिँदै १९ वटा ठाउँबाट आचारसंहिता उल्लङ्घन गरी राखिएको दलहरूको प्रचार सामग्री हटाएको बताउनुभयो ।
जिल्ला प्रशासन कार्यालय तथा निर्वाचन अधिकृतको कार्यालयका प्रतिनिधिले भक्तपुरमा निर्वाचन आचारसंहिता विपरीतका काम भइरहेको जनाउँदै मतदातालाई विभिन्न प्रलोभनमा पारि सामान बाँड्न सुरु गरेको बताउनुभयो ।
प्रहरी उपरीक्षक श्रेष्ठले भन्नुभयो, ‘पार्टीका झण्डा, चुनाव चिह्न, फ्लेक्स लगायतका प्रचार सामग्री १८÷१९ ठाउँको हामीले हटाएका छौँ, कतिपय ठाउँमा त्यस्ता चुनाव चिह्न राखेका दलका स्थानीय नेता कार्यकर्तासँग त कतिपय ठाउँमा जिल्ला तहका नेतासँग कुरा गरेर हटाएका छौँ, यस्ता सामग्री राखेर आचारसंहिता उलङ्घन गर्नेमा चुनावमा रहेका मुख्य ६ दलकै रहेका छन् ।’ प्रचार सामग्री हटाउन ठूला दलहरूले नै अटेर गर्ने गरेको उहाँको भनाइ छ । गाडीमा पार्टीको झण्डा र चुनाव चिह्न, ब्यानर राखेर जाने गरेको भन्दै उहाँले पार्टी आफैँले आचारसंहिताको पालना गर्दै आफैँले अनुगमन गर्नुपर्नेमा आफैँले उल्लङ्घन गर्ने गरेको गुनासो गर्नुभयो ।
भक्तपुर जिल्ला अदालतका मुख्य न्यायाधीश एवम् मुख्य निर्वाचन अधिकृत गोपालप्रसाद बाँस्तोलाले विगतका चुनावमा भन्दा कर्मचारी आधा कम तर काम धेरै हुँदा कार्यसम्पादनमा चाप परेको बताउनुभयो । कर्मचारीले खानाको भरमा बिहान ७ बजेदेखि राति ७ बजेसम्म काम गर्नुपरेको उल्लेख गर्दै उहाँले त्यही कर्मचारी फेरि अनुगमन पनि जान सक्ने अवस्था अहिले कम भएको बताउनुभयो । उहाँले भन्नुभयो, ‘हामी यहीँ बाटो ओहोरदोहोर गर्दा पनि अनुगमन गरिरहेकै हुन्छौँ, आचारसंहिता रोक्न सक्दो प्रयास गरेका छौँ, दलहरूले नै बनाएको आचारसंहिता दलहरूले नै पालना गर्नुपर्ने हो । राजनीतिक दल, पत्रकार, सचेत नागरिकले आचारसंहिता उल्लङ्घन भएको पाइए जानकारी गराउनुहोस्, हामी तत्काल रोक्छौँ, आवश्यक परे कारबाही गर्छौँ ।’
यद्यपि काठमाण्डौको तुलनामा भक्तपुरमा आचारसंहिता उल्लङ्घन निकै कम रहेको दाबी गर्दै उहाँले त्यसलाई पनि रोक्न सक्दो प्रयास गरिरहेको जानकारी बताउनुभयो । उहाँले मतगणनास्थलमा सीसी क्यामरा जडान भइरहेको जानकारी दिँदै मतदानका दिनमा मतदाता परिचयपत्र नभए नागरिकता, सवारी अनुमतिपत्र, लालपूर्जा लगायतका पहिचान खुल्ने कागजले पनि मतदान गर्न पाइने बताउनुभयो ।
जिल्ला निर्वाचन कार्यालयका प्रमुख नरेन्द्रप्रसाद न्यौपानेले सञ्चारमाध्यम र सञ्चारकर्मीले मान्नुपर्ने निर्वाचन आचारसंहिताका बारेमा जिल्लाका क्रियाशील पत्रकारलाई जानकारी दिनुभएको थियो । कार्यक्रममा क्रियाशील पत्रकार मञ्चका अध्यक्ष एवम् पत्रकार रमेश गिरीले चुनावका दिन समाचार, तस्बिर तथा भिडियो सङ्कलनका सहजता प्रदान गर्न, सवारी पासको व्यवस्था गर्न माग गर्नुभयो । उहाँले मतगणनास्थलमा सञ्चार कक्षको स्थापना गरेर सहजै मतगणनाको नतिजा सञ्चारकर्मीलाई उपलब्ध गराउने व्यवस्था गर्न, मतगणनास्थलमा मतपत्र खन्याउँदै गरेको तस्बिर तथा भिडियो लिने व्यवस्था गरिदिन आग्रह गर्नुभयो ।
