चितवन । भरतपुर भ्रमण वर्ष २०२४ लाई लक्षित गरी चितवनमा पहिलो पटक ‘प्रथम मिस्टर चितवन प्रतियोगिता २०८१’ हुने भएको छ । चितवन जिल्ला शारीरिक सुगठन तथा फिटनेश संघको आयोजनामा असोज १२ गते हुन गइरहेको उक्त प्रतियोगिताको शनिबार पत्रकार सम्मेलनमार्फत जानकारी गराइएको हो ।
पत्रकार सम्मेलनमा संघका अध्यक्ष प्रकाश गुरुङले प्रत्येक वेट क्याटगोरीका बिजेता (गोल्ड मेडलिष्ट) लाई रु. ३० हजार, फष्ट रनर अप (सेकेन्ड) लाई २० हजार र सेकेन्ड रनरअप (तृतीय) लाई १० हजार नगदसहित ट्रफी मेडल र गिफ्ट ह्याम्पर प्रदान गरिने बताए ।
छुट्टाछुट्टै वेट क्याटगोरीबाट छनौट भएका गोल्ड मेडलिष्टहरु बीच प्रतिस्पर्धा गराएर मिष्टर चितवन २०८१ चुनिने छ भने विजेताले एकलाख पचास हजार नगदसहित ट्रफी, मेडल र गिफ्ट ह्याम्पर पाउने अध्यक्ष गुरुङले जानकारी दिए ।
प्रतियोगिताको पुरुषतर्फ हुने विभिन्न तौल समूह ५५ केजी, ६० केजी, ६५ केजी, ७० केजी, ७५ केजी र ७५ केजीभन्दा माथिका मास्टर बेट खुल्ला प्रतिस्पर्धा गराइने छ ।
यस्तै महिलातर्फ हुने ओमन एथलेटिक्स फिजिक्स प्रतियोगिताका विजेताले रु. ५० हजार, फष्टर रनरअप (सेकेन्ड) ले रु. २५ हजार र सेकेन्ड रनरअप (तृतीय) हुनेले रु. १५ हजारसहित ट्रफी, मेडल र गिफ्ट ह्याम्पर प्राप्त गर्नेछन् ।
प्रतियोगिताको प्रमुख निर्णायक भूमिकामा मिष्टर नेपाल विजेता प्रतापकाजी बरियासहित ९ जना सहायक निर्णायकहरु रहने छन् ।
नेपाल शारीरिक सुगठन तथा फिटनेश महासंघका अध्यक्ष राजेशबाबु श्रेष्ठ प्रमुख अतिथि रहने आयोजकले जनाएको छ । ‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ हुन गइरहेको उक्त प्रतियोगिताको २० लाख रुपैयाँ खर्च अनुमान गरिएको छ ।
कार्यक्रमको मुख्य प्रयोजकमा युरो अटोमोटिभ प्रा.लि. सहप्रायोजकमा सेन्ट्रल कलेज अफ भोकेशनल प्रालि, प्रवद्र्धकमा भरतपुर महानगरपालिका र रत्ननगर नगरपालिका रहेका छन् । यस्तै हस्पिटल पार्टनरमा नेशनल सिटि हस्पिटल, रेष्टुरेन्ट पार्टनरमा ह्यानकुक रेष्टुरेण्ट (साराङ), हस्पिटालिटी पार्टनरमा चितवन मिट टाउन रिसोर्ट, मिडिया पार्टनरमा उज्यालो टाइम्स मिडिया एण्ड एडभरटाइजिङ प्रालि छन् ।
