चितवनको पहिलो प्लस टु कलेज गुरुकुल कलेजमा गुरुकुल इको युथ क्लबको पुनः गठन गरिएको छ । समाजसेवा, सामाजिक परिवर्तन र व्यवहारिक ज्ञान आर्जनको उद्धेश्यले उक्त क्लब गठन गरिएको हो ।
पुनः गठित क्लबको अध्यक्षमा कक्षा १२ का विद्यार्थी प्रदिप खरेल चयन भएका छन् । कार्यसमितिमा कक्षा १२ बाट १३ जना र कक्षा ११ बाट १० जना विद्यार्थी छनौट हुनेछन् । हाल खरेलको अध्यक्षतामा कक्षा १२ का विद्यार्थीलाई मात्रै समेटेर नयाँ कार्यसमिति गठन गरिएको हो ।
क्लबको उपाध्यक्षमा दिप्ती सुवेदी, सह सचिवमा आयुष ओझा र कार्यक्रम संयोजकमा शुसान्त पाण्डे चयन भएका छन् भने कार्यसमिति सदस्यहरुमा आर्यन महतो, कृतिका थापा, स्मारिका अधिकारी, निश्चल सापकोटा, सञ्चिता आचार्य र आकांक्षा थापा लगायत चयन भए ।
कक्षा ११ का नवआगन्तुक विद्यार्थीलाई पनि समेटेपछि क्लबको कार्यसमितिले पुर्णता पाउने छ । कक्षा ११ बाट एक सचिव, एक कोषाध्यक्ष र आठ जना सदस्य गरी जम्मा १० जना विद्यार्थी कार्यसमितिमा बस्न पाउनेछन् ।
कक्षा ११ र १२ का बाँकी सबै विद्यार्थी क्लबको साधारण सदस्य बन्नेछन् । यस क्लबले विभिन्न समयमा अस्पतालमा पैसाको अभावले उपचार नपाएका विरामीलाई आर्थिक सहयोग संकलन, अनाथ आश्रममा शैक्षिक सामाग्री तथा खाद्यान्न सहयोग र मौलाकालिका मन्दिरको फेदीदेखि मन्दिर परिसरसम्म सरसफाई जस्ता काम गर्दै आएको छ ।
यो क्लबले पवित्र धार्मिकस्थल देवघाटधाममा विशेषगरी साउन र माघ महिनामा उत्सर्जित फोहोर संकलन तथा व्यवस्थापन, बृद्धाश्रममा खाद्यान्न र न्यानो कपडा वितरण, विभिन्न आर्थिक सहयोगका लागि नारायणी नदी किनारमा च्यारिटी शो लगायतका कार्यक्रमहरु गर्दै आएको छ । कलेजमा विभिन्न अतिरिक्त क्रियाकलालप तथा जिल्ला स्तरिय तहको गुरुकुल फेस्ट समेत हुने गरेको छ ।
क्लबको पुनः गठन कार्यक्रममा अघिल्लो कार्यसमितिका सदस्यहरुलाई कदरपत्र र मायाको चिनो दिएर सम्मान गरी विदाई गरिएको छ । अघिल्लो कार्यसमिति रोजित केसीको नेतृत्वमा थियो । क्लबको अघिल्लो कार्यसमितिको डाइरेक्टरमा कलेजका सहायक प्राचार्य जेएन लामिछाने थिए भने हालको कार्यसमितिको डाइरेक्टरमा शिक्षक हरिहर भुसाल चयन भएका छन् । कलेजका प्राचार्य क्लबको संरक्षक रहने व्यवस्था छ ।
