भरतपुर-सुनचाँदी बचत तथा ऋण सहकारी संस्था नारायणगढले सुनचाँदी व्यवसायी महासंघमा निर्वाचित आफ्ना शेयर सदस्यहरुलाई बधाई तथा शुभकामना व्यक्त गरेको छ । सहकारीका अध्यक्ष रुविन रामुदामुको अध्यक्षतामा सम्पन्न कार्यक्रममा सुनचाँदी व्यवसायी महासंघको हालै सम्पन्न अधिवेशनवाट अध्यक्षमा निर्वाचित सहकारीका पुर्व अध्यक्ष एवं सल्लाहकार अर्जुन रसाईली, सचिवमा निर्वाचित सहकारीका उपाध्यक्ष टुलक प्रसाद विश्वकर्मा, प्रवक्तामा निर्वाचित सहकारीका कानुनी सल्लाहकार जिवनज्योति सदासंकर, केन्द्रिय सदस्यमा निर्वाचित सहकारीका सहसचिव ऋतु सेन्चुरीलाई क्षेत्रपुर स्थित दियालो फुडल्याण्डमा एक औपचारिक कार्यक्रमका विच प्रमाणपत्रसहित दोसल्ला ओढाएर बधाई ज्ञापन गरिएको हो ।
कार्यक्रममा बोल्दै नवनिर्वाचित अध्यक्ष रसाईलीले चुनाव जितेसंगै आफु सवै व्यवसायीको साझा अध्यक्ष भएको वताउँदै भोट दिने र नदिने सवैलाई समान व्यवहार गरि अगाडी वढ्ने वताउनु भयो । चुनावको समयमा प्रविधिक कारणले कोहि एकातिर त कोहि अर्कोतिर लाग्ने अवस्था भएपनि अव भने सम्पुर्ण व्यवसायी एकढिक्का हुनुपर्ने उहाँको भनाई थियो । चुनाव हारेका व्यवसायीहरुलाई पनि उचित व्यवस्थापन गर्न आफु तयार रहेको वताउँदै अध्यक्ष रसाईलीले व्यवसायीको हितमा काम गर्ने प्रतिवद्धता व्यक्त गर्नु भयो ।
कार्यक्रममा नवनिर्वाचित सचिव टुलक प्रसाद विश्वकर्मा, प्रवक्ता जिवनज्योति सदासंकर, केन्द्रिय सदस्य ऋतु सेन्चुरी, सहकारीका निवर्तमान अध्यक्ष बाबुराम रामदाम, सल्लाहकार चित्र बहादुर खाती, ददिराम रामदाम, सुनचाँदी व्यवसायी संघ चितवनका महासचिव गोपाल बहादुर थापालगायतले शुभकामना मन्तव्य व्यक्त गर्नु भएको थियो । सहकारीका सचिव निलेनमान शाक्यले संचालन गर्नु भएको कार्यक्रममा शिक्षा समितिका संयोजक खड्ग सदासंकरले स्वागत मन्तव्य व्यक्त गर्नु भएको थियो भने प्रवन्धक रमेश रामदामले कार्यक्रमको व्यवस्थापन गर्नु भएको थियो ।
