नेकपा माओवादी केन्द्रका राष्ट्रिय सभा सांसद सुरेशकुमार आले मगरले एमाले अध्यक्ष केपी शर्मा ओलीले आफ्नो पार्टी बचाउन संसद विघटन गरेको भनेर दिएको अभिव्यक्तिप्रति असन्तुष्टि जनाएका छन् ।
सोमबार राष्ट्रियसभा बैठकमा विशेष समय लिएर बोल्दै उनले नयाँ सत्ता समीकरण बनाएर हिँडिरहेका बेला त्यस्तो कुरा नकोट्याउनु उपयुक्त हुने बताएका हुन् । सांसद आले मगरले आफूसमेत बस्ने साझा घर भत्काए जसरी अध्यक्ष ओलीले पार्टीमा झगडा भयो भनेर प्रतिनिधिसभा विघटन गरेको भन्दै असन्तुष्टि जनाए ।
उनले नयाँ सत्ता समीकरणमा सामेल भएकाले कसैले पनि त्यो समीकरणमाथि आँच आउने खालको अभिव्यक्ति दिन नहुने पनि बताए । ‘केही दिनअघि प्रतिनिधिसभा विघटनबारे कुराहरू पनि आए । त्यो घटना बितिसकेको छ । आफ्नो घरमा घरका सदस्यहरूबीच झगडा भयो । घरमुलीले आफूसमेत भएको साझा घर भत्काइदियो । आफ्नो घरमा झगडा भएको छ भने त आफ्नो घरको झगडाको पो मिलाउने होला । आफूसमेत बस्ने साझा घर भत्काएर त आफ्नो घर कसरी बन्छ होला,’ अध्यक्ष ओलीप्रति लक्षित गर्दै उनले भने, ‘जे जे भए पनि त्यो सन्दर्भ बिर्सिसकेको अवस्था थियो । त्यो नकोटयाएको भए हुन्थ्यो ।’
सांसद आले मगरले आगामी आर्थिक वर्षको बजेट कार्यान्वयनमा इमानदार भएर लाग्न पनि कर्मचारीतन्त्रलाई आग्रह गरे ।
