वीरगंज
मधेश प्रदेश प्रहरी कार्यालयले जिल्ला प्रहरी कार्यालय धनुषामा कार्यरत दुईजना प्रहरी कर्मचारीलाई कारवाही गरेको छ । प्रहरी नायब महानिरीक्षक यज्ञ विनोद पोखरेलको निर्देशनमा मधेश प्रहरी कार्यालयले अपराधिक विश्वासघात तथा अपराधिक लाभ लिएको आरोपमा एकजना प्रहरी सहायक हवल्दार र एकजना प्रहरी जवानलाई कारवाही गरेको हो ।
कारवाहीमा पर्नेहरुमा जिल्ला महोत्तरी, महोत्तरी गाउँपालिका वडा नं. ५ घर भई हाल जिल्ला प्रहरी कार्यालय धनुषामा कार्यरत बर्ष ३४ को प्रहरी सहायक हवल्दार दिपेन्द्र कुमार राज र जिल्ला सुनसरी देवानगंज गाउँपालिका वडा नं.२ घर भई हाल जिल्ला प्रहरी कार्यालय धनुषामा कार्यरत बर्ष २१ को प्रहरी जवान रोशन कुमार यादव रहेका छन् ।
निजद्वयले आपराधिक लाभ लिने नियतले प्रहरी समक्ष आएका पीडितहरुको बिभिन्न कम्पनीको मोबाईल ३१ थान लिई फिर्ता गर्न भन्दा नगद २ लाख रुपैयाँ समेत लिएर मोबाइल फिर्ता नगरी आफैसँग राखेको जाहेरीको आधारमा मधेश प्रदेश प्रहरी कार्यालयका प्रमुख प्रहरी नायब महानिरीक्षक पोखरेलको निर्देशनमा कारवाही प्रक्रिया अगाडि बढाइएको हो ।
प्रहरी कर्मचारीद्वयले गरेको अपराधिक विश्वासघात तथा अपराधिक लाभ लिने कार्यबारे लिखित जाहेरी प्राप्त भएपछि प्रहरी नायब महानिरीक्षक पोखरेलको निर्देशनमा अनुसन्धानको क्रममा २०८० फागुन ११ गते जिल्ला धनुषा जनकपुरधाम उपमहानगरपालिका ७ स्थितमा रहेको अन्जनी माई कुट्टीको उत्तर तर्फ रहेको पोखरीको डिलको तल झाडीमा सानो रातो रंगको ब्याग भित्र निजहरुले लुकाई छिपाई राखेको अवस्थामा बिभिन्न कम्पनीको मोबाईल ३१ थान र पीडितबाट लिएको नगद २ लाख रुपैयाँमध्येबाट ९५ हजार रुपैयाँ निजहरुकै रोहबरमा प्रहरीले बरामद गरेको थियो ।
बरामद गरिएको सामान एवं राशी सहित दुबै जनालाई कानुन बमोजिम पक्राउ गरी पीडितको जाहेरीको आधारमा जिल्ला प्रहरी कार्यालय धनुषामा अपराधिक विश्वाशघात र अपराधिक लाभ शीर्षकमा मुद्दा दर्ता गरी फागुन १३ गते सम्मानित जिल्ला अदालत धनुषाबाट ७ दिनको म्याद थप गरी अनुसन्धान भइरहेको प्रहरी नायब महानिरीक्षक पोखरेलले जानकारी दिए ।
