चितवन, पुस १६-
उद्योग वाणिज्य संघ चितवनमा अध्यक्षको लागि वरिष्ठ उपाध्यक्ष सुमनकुमार श्रेष्ठ र तृतीय उपाध्यक्ष सिरिस पन्तले अध्यक्ष पदमा उम्मेदवारी दिएका छन्
संघको ५७ औं वार्षिक साधारण सभा तथा अधिवेशनमा आज भएको नयाँ नेतृत्वको लागि श्रेष्ठ र उपाध्यक्षले मनोनयन दर्ता गरेका हुन् । आज बिहान १० बजेबाट १:३० सम्म उम्मेदवार मनोनयनको लागि समय तोकिएको थियो ।
उम्मेदवारी दिए पछि बरिष्ठ उपाध्यक्ष श्रेष्ठले व्यवसायीहरुको हकहितको लागि आफूले उम्मेदवारी दिएको बताएका छन् । उनी बिगत १८ वर्षदेखि उद्योग वाणिज्य संघको विभिन्न जिम्मेवारीमा रहेर काम गरिसकेका छन् । भरतपुर महानगरपालिका–१२ मा जन्मिएका श्रेष्ठ फर्निचर व्यवसायीको रुपमा चिरपरिचित छन् ।
भरतपुर–१२ मा जन्मिएका अर्का व्यवसायी सिरिस पन्तले उद्योग वाणिज्य संघमा बेथिति मौलाएको भन्दै पारदर्शिता र संस्थागत सुशासनको लागि उम्मेदवारी दिएको बताएका छन् । हार्डवेयर व्यवसायमा संलग्न ४१ वर्षीय पन्त चितवनका चिरपरिचित युवा व्यवसायी हुन् । उनले आफू अध्यक्षमा निर्वाचित भएमा प्रतिफल आउने गरी काम गर्ने दाबी गर्दै आएका छन् । उनले भने, ‘ युवाहरु विदेशिएको समयमा म देशमा व्यवसाय गरेर युवालाई रोजगारी दिएर बसिरहेको छु । म जस्तो युवाले देशमा केही गरेर देखाउँन चाहन्छु । अध्यक्षमा जित्ने मेरो व्यवसायिक आधार छ ।’
नयाँ नेतृत्वको लागि पुस २३ गते निर्वाचन तालिका तोकिएको छ । पुस १७ गते भोलि उम्मेदवारहरुको अन्तिम नामाबली प्रकाशन गरिने तालिका छ । कार्यसमितिमा अध्यक्ष, वरिष्ठ उपाध्यक्ष, तीन उपाध्यक्ष गरी २५ जना रहने छन् ।
