चितवन । चितवनको भरतपुरमा रहेको कलेज अफ मेडिकल साईन्सेस शिक्षण अस्पताल (पुरानो मेडिकल कलेज) उपचारको क्रममा मृत्यु भएकी महिलाका छोरा पढाउन र घटनाबारे छानविन गर्न तयार भएको छ । घटनापछि आज भएको वार्तामा मृतका दुई छोरालाई कक्षा १२ सम्म पढाउने र घटनाको सत्यतथ्य छानविन गर्ने अस्पताल सहमति भएको हो ।
खैरहनी नगरपालिका वडा नं. १० बडगाँउकी ३२ वर्षीया शर्मिला हट्वाल उप्रेतीको बिहीबार सोही अस्पतालमा उपचारको क्रममा मृत्यु भएको थियो । आफन्तले डाक्टरहरुको लापहरबाहीका कारण ज्यान गएको आरोप लगाउँदै आज शुक्रबार अस्पताल घेराउ गरेका थिए । आफन्तले अस्पताल घेराउ गरेपछि अस्पतालमा ठूलो संख्यामा प्रहरी परिचालन गरेर स्थितिलाई नियन्त्रणमा लिईएको थियो । साउन ९ गते ज्वरो र पिसाब सम्बन्धी समस्याका कारण शर्मिला अस्पतालमा उपचारका लागि भर्ना भएकी थिइन् ।
मृतकका जेठाजु नमराज उप्रेतीले चिकित्सकले हाईडोजको इन्जेक्सन चलाएको र बिरामीलाई समस्या बढ्दै जाँदा डाक्टर नआएको कारण बिरामीको ज्यान गएको आरोप लगाउनुभयो । उहाँले अस्पतालको चरम लापरवाहीले सामान्य बिरामीको पनि ज्यान गएको बताउनुभयो । वार्तापछि १० वर्ष र ६ वर्षका दुई छोरालाई कक्षा १२ सम्मको शिक्षाका लागि लाग्ने खर्च पुरानो मेडिकल कलेजले व्यहोर्ने सहमति भएको छ । यसैगरी आईतबार जिल्ला प्रशासन कार्यालयमा छानविन समिति गठन गर्ने सहमति पनि बनेको छ ।
समितिले छानविनको क्रममा दोषी देखिए कानुन अनुसार कारवाही गर्ने सहमति बनेको वार्तामा सहभागीले बताए । आफन्तले शव बुझेर अन्तिम संस्कार गर्ने सहमति समेत बनेको छ । वार्तामा अस्पताल प्रशासन, बिरामीका आफन्त, जिल्ला प्रहरी कार्यालय, जिल्ला प्रशासन कार्यालयका र वडा कार्यालयका प्रतिनिधि सहभागी हुनुहुन्थ्यो । अस्पतलले भने घटनापछि कुनै प्रतिक्रिया जनाएको छैन । अस्पतालका जिम्मेवार व्यक्तिहरु सञ्चारमाध्यमको सम्पर्कमा आउन चाहेनन् ।
