बैशाख २२, चितवन । माओवादी केन्द्रको भातृ संगठन वाईसीएलको आक्रमणबाट एमालेका कार्यकर्ता महेन्द्र विक घाइते भएका छन् ।
वाईसीएल कालिकाका इन्चार्ज नवराज घलानले उनलाई आक्रमण गरेको आरोप लगाइएको हो ।
कालिका–३ शान्ति टोल पदमपुर निवासी ३४ वर्षीय विकलाई वाईसीएल कालिकाका इन्चार्ज घलानले गए राति ११ बजे फोन गरी घरबाट बोलाएर आक्रमण गरेका छन् ।
बोलाएर २०० मिटर पर लगि १५÷१६ जनाको समूहले बोत्तल तथा सीसाले टाउकोमा हानेको स्थानीयले बताएका छन् । एमालेको भातृ संगठन युवा संघका नगर सदस्यसमेत रहेका विकको अहिले गम्भीर अवस्थामा भरतपुरको पुरानो मेडिकल कलेजमा उपचार भइरहेको नेकपा एमाले कालिकाका सचिव शुदर्शन अधिकारीले जानकारी दिए । विकको टाउकोमा गम्भीर चोट लागेको छ ।
वाईसीएल कालिकाका इन्चार्ज नवराज घलान यस अगाडि पनि एमाले जिल्ला कमिटी सदस्य ऋषिराम मरहठ्ठालाई आक्रमण गरी प्रहरी हिरासतमा रहेका थिए । उनी करिब २ महिना अगाडि धरौटी जमानतमा छुटेका थिए ।
