बैशाख १३, माडी । चितवनको माडीमा बस दुर्घटना हुँदा ६ जना घाइते भएका छन् । माडी नगरपालिका ८ कृतनपुरमा लु २ ख ६ नम्बरको बस अनियन्त्रित भई दुर्घटना भएको हो ।
दुर्घटनामा परी माडी ७ देवेन्द्रपुरकी १४ वर्षीया समिक्षा काफ्ले, सोही स्थानकी ३४ वर्षीया राधिका काफ्ले, माडी ९ गणेशकूञ्जकी २८ वर्षीया लक्ष्मी थापा र उनकी छोरी ९ वर्षीया बिपना थापा घाइते भएका छन् । उनीहरुको बघौडा अस्पतालमा उपचार भइरहेको छ । उनीहरु सबैको अवस्था मध्यम रहेको जिल्ला प्रहरी कार्यालय चितवनले जानकारी दिएको छ ।
यस्तै दुर्घटनामा माडी ९ सेउलीबासकी २९ वर्षीया पार्वती सुवेदी र माडी ७ कृतनपुर कुतनपुरकी ६६ वर्षीया पुर्णकला अधिकारी सामान्य घाइते भएका छन् । उनीहरु दुबैको स्थानीय मेडिकलमा उपचार भईरहेको प्रहरीले जनाएको छ ।
दिउँसो १२:३० बजे बगईबाट नारायणगढ तर्फ आउँदै गरेको बसको स्प्रीङ पट्टा भाँचिएर अनियन्त्रित भई सडकको दाईने पट्टीको नालामा खसेको प्रहरीले जनाएको छ । बसका चालक प्रहरीको नियन्त्रणमा रहेका छन् ।
