चितवन- विश्वभर विभिन्न कार्यक्रम गरी मनाइने ‘विश्व सरसफाइ दिवस’ (World Cleanup Day) को अवसरमा चितवनको भरतपुरस्थित चौबीसकोठीमा एक बृहत् सरसफाइ तथा जनचेतनामूलक कार्यक्रम सम्पन्न भएको छ। इस्टोनियाबाट सुरु भएको यो विश्वव्यापी अभियान हाल विश्वका २१० भन्दा बढी देश तथा क्षेत्रहरूमा फैलिएको छ। सोही अभियानअन्तर्गत ग्रीनल्याण्ड पब्लिक स्कुलको मुख्य आयोजना तथा २५ भन्दा बढी विभिन्न सामाजिक, स्वास्थ्य तथा व्यावसायिक संघ–संस्थाहरूको सहकार्यमा उक्त कार्यक्रम आयोजना गरिएको हो।
कार्यक्रमका प्रमुख अतिथि जिल्ला प्रहरी कार्यालय चितवनका प्रहरी उपरीक्षक (एसपी) ले बालबालिका तथा विद्यार्थीहरू भोलिका कर्णधार भएकाले उनीहरूलाई सानै उमेरदेखि वातावरण संरक्षण, व्यक्तिगत तथा सामाजिक सरसफाइको महत्त्वबारे सिकाउनु अपरिहार्य रहेको बताउनुभयो।
ग्रीनल्याण्ड पब्लिक स्कुलकी प्रिन्सिपल तथा कार्यक्रमकी सभाध्यक्ष इन्दिरा पन्त कार्कीले विद्यालयले सैद्धान्तिक ज्ञानमा मात्र सीमित नभई पुस्तकलाई व्यावहारिक जीवन र वातावरणसँग जोड्ने अभ्यास गरिरहेको धारणा राख्नुभयो। उहाँले वातावरण संरक्षणप्रतिको सचेतनालाई प्राथमिकता दिँदै यस्ता सामाजिक अभियानमा बालबालिकालाई सहभागी गराउँदै आएको उल्लेख गर्नुभयो।
कार्यक्रममा ‘लेट्स डु इट’ (Let’s Do It) का कन्ट्री लिडर मिलन न्यौपानेले इस्टोनियाबाट प्रारम्भ भई हाल २१० भन्दा बढी देश र क्षेत्रहरूमा फैलिएको यस विश्वव्यापी सरसफाइ अभियानको औचित्य तथा अवधारणामाथि प्रकाश पार्नुभएको थियो। त्यस्तै, सामाजिक अभियन्ता अर्जुन भुसालले स्वच्छ वातावरण निर्माणमा हरेक नागरिकको भूमिका महत्वपूर्ण रहने उल्लेख गर्दै उपस्थित सबैलाई अभियानमा निरन्तर जुट्न उत्प्रेरित गर्नुभयो।
‘बेटर चितवन’का संस्थापक अध्यक्ष तथा सामाजिक अभियन्ता सागर कार्कीले अव्यवस्थित फोहोरमैलाले वातावरण, जनस्वास्थ्य र जैविक विविधतामा पारिरहेको नकारात्मक असरबारे चर्चा गर्दै फोहोर व्यवस्थापन घरैबाट सुरु गर्नुपर्नेमा जोड दिनुभयो।
सेप्टेम्बर २० तारिखका दिन चौबीसकोठी क्षेत्रमा सञ्चालित उक्त सरसफाइ कार्यक्रममा विद्यार्थी, शिक्षक, स्थानीय नागरिक तथा विभिन्न संस्थाका प्रतिनिधि गरी ३०० भन्दा बढीको सक्रिय सहभागिता रहेको थियो। सहभागीहरूले सडक तथा आसपासको क्षेत्रबाट ३० बोराभन्दा बढी ठोस फोहोर संकलन गरी उचित व्यवस्थापन गरेका थिए।
